ممبئی: خام تیل کی قیمتوں میں اضافے اور انفارمیشن ٹیکنالوجی (آئی ٹی) کمپنیوں کے حصص میں فروخت کے دباؤ کے باعث ہندستانی شیئر بازار میں جمعرات کو مسلسل چوتھے دن گراوٹ رہی۔ دونوں اہم اشاریے خسارے میں بند ہوئے۔ بی ایس ای سینسیکس 417 پوائنٹس جبکہ این ایس ای نفٹی 41 پوائنٹس کی کمی کے ساتھ بند ہوا۔ 30 کمپنیوں پر مشتمل بی ایس ای سینسیکس 417.49 پوائنٹس یعنی 0.55 فیصد گر کر 76,152.86 پوائنٹس پر بند ہوا۔ سینسیکس تیزی کے ساتھ کھلا تھا اور ایک وقت میں 354.13 پوائنٹس کے اضافے کے ساتھ 76,924.48 پوائنٹس کی بلند ترین سطح تک پہنچ گیا تھا، تاہم بعد میں اس کی ساری برتری ختم ہوگئی۔

نیشنل اسٹاک ایکسچینج (این ایس ای) کا 50 کمپنیوں پر مشتمل نفٹی بھی 41 پوائنٹس یعنی 0.17 فیصد گر کر 23,873.45 پوائنٹس پر بند ہوا۔ عالمی بازاروں میں بہتری اور حالیہ دنوں میں غیر ملکی سرمایہ کے بہاؤ کے باعث ابتدائی کاروبار میں بازار میں تیزی دیکھی گئی، لیکن عالمی غیر یقینی صورت حال کے درمیان سرمایہ کاروں کے محتاط رویے کے سبب کاروبار کے آخری گھنٹے میں یہ تیزی کم ہوگئی۔

سینسیکس میں شامل کمپنیوں میں ٹائٹن، ٹرینٹ، آئی ٹی سی، مہندرا اینڈ مہندرا، بجاج فِن سَرو، ایچ سی ایل ٹیکنالوجیز، ٹیک مہندرا، سن فارماسیوٹیکلز، ٹاٹا کنسلٹنسی سروسز، الٹرا ٹیک سیمنٹ اور بجاج فنانس کے حصص نمایاں طور پر خسارے میں رہے۔ دوسری جانب منافع میں رہنے والے حصص میں ایکسس بینک، اڈانی پورٹس، ایشین پینٹس، ایچ ڈی ایف سی بینک، بھارتی ایئرٹیل، بھارت الیکٹرانکس لمیٹڈ اور ٹاٹا اسٹیل شامل رہے۔

بی ایس ای میں درج حصص میں سے 2,545 میں اضافہ ہوا، جبکہ 1,778 میں گراوٹ درج کی گئی۔ 223 حصص کی قیمتوں میں کوئی تبدیلی نہیں ہوئی۔ عالمی سطح پر تیل کی قیمت کا معیار برینٹ کروڈ 1.57 فیصد بڑھ کر 97.13 ڈالر فی بیرل ہوگیا۔ جیوجیت انویسٹمنٹس لمیٹڈ کے سربراہِ تحقیق ونود نائر نے کہا، ’’خام تیل کی قیمتوں میں اضافہ ملکی بازار کے لیے دباؤ کی ایک بڑی وجہ بنا ہوا ہے۔‘

‘ انہوں نے کہا کہ عالمی سطح پر ملنے والے مثبت اشاروں اور غیر ملکی ادارہ جاتی سرمایہ کاروں (FII) کی خریداری کے باوجود مسلسل برقرار عالمی خدشات اور عالمی بانڈ کی پیداوار بلند رہنے کے باعث بازار میں بحالی کی کوشش کمزور پڑ گئی۔ نائر نے کہا، ’’بینک اور رئیلٹی کے حصص نے بازار کو کچھ سہارا دیا، جبکہ چھوٹی کمپنیوں کے حصص میں سرمایہ کاروں کی دلچسپی برقرار رہی، جو ملکی ترقی کے امکانات پر اعتماد کی عکاسی کرتی ہے۔‘‘

اہم اشاریوں میں گراوٹ کے باوجود چھوٹی اور درمیانی کمپنیوں سے متعلق اشاریوں میں تیزی رہی۔ اسمال کیپ سلیکٹ انڈیکس 1.02 فیصد بڑھا، جبکہ مڈ کیپ سلیکٹ میں 0.09 فیصد کا اضافہ ہوا۔ بروکریج پلیٹ فارم لیمن کے سربراہِ تحقیق گورو گرگ نے کہا، ’’ہندوستانی شیئر بازار میں اتار چڑھاؤ رہا۔ اہم اشاریے ابتدائی تیزی برقرار نہیں رکھ سکے اور بلند سطح پر منافع وصولی کے دباؤ کے باعث گراوٹ کے ساتھ بند ہوئے۔‘‘

انہوں نے کہا کہ عالمی سطح پر جاری غیر یقینی صورت حال اور سرمایہ کاروں کے کمزور رجحان کے درمیان بازار محتاط رہا۔ اہم شعبوں میں فروخت کے دباؤ نے بھی گراوٹ میں اضافہ کیا۔ ایشیا کے دیگر بازاروں میں ملا جلا رجحان رہا۔ ہانگ کانگ کے ہینگ سینگ اور جاپان کے نکیئی میں گراوٹ رہی۔

چین کا شنگھائی ایس ایس ای کمپوزٹ مستحکم بند ہوا، جبکہ جنوبی کوریا کا کوسپی تیزی میں رہا۔ یورپ کے اہم بازاروں میں بھی دوپہر کے کاروبار کے دوران گراوٹ کا رجحان رہا۔ امریکی بازار بدھ کو تیزی کے ساتھ بند ہوئے تھے۔ شیئر بازار کے اعداد و شمار کے مطابق، غیر ملکی ادارہ جاتی سرمایہ کاروں (FII) نے بدھ کو 6,688.37 کروڑ روپے مالیت کے حصص خریدے۔ گھریلو ادارہ جاتی سرمایہ کاروں (DII) نے بھی 2,812.98 کروڑ روپے کی خریداری کی۔ بدھ کو بی ایس ای سینسیکس 373.93 پوائنٹس گر کر 76,570.35 پوائنٹس پر بند ہوا تھا، جبکہ این ایس ای نفٹی 141.35 پوائنٹس کی گراوٹ کے ساتھ 23,914.45 پوائنٹس پر بند ہوا تھا۔