: بابا رام دیو نے حال ہی میں دعویٰ کیا تھا کہ ہمدرد کمپنی اپنے منافع کو مساجد اور مدارس بنانے میں استعمال کر رہی ہے۔ ہمدرد نے اس معاملے میں ہتک عزت کا مقدمہ دائر کیا ہے ۔ دہلی ہائی کورٹ نے یوگا گرو بابا رام دیو کو ہمدرد کمپنی اور اس کی مقبول پروڈکٹ روح افزا کے خلاف قابل اعتراض ریمارکس پر سرزنش کی ہے۔ عدالت نے کہا ہے کہ رام دیو کا اس کے لیے کوئی دفاع نہیں ہے۔ دہلی ہائی کورٹ نے یہ بھی کہا، '(بابا رام دیو کے) اس بیان نے عدالت کے ضمیر کو جھنجھوڑ دیا ہے۔ اس کے لیے کوئی عذر نہیں ہے۔' اس دوران بابا رام دیو نے دہلی ہائی کورٹ میں کہا کہ شربت جہاد کا ویڈیو سوشل میڈیا سے ہٹا دیا گیا ہے۔درحقیقت، بابا رام دیو نے حال ہی میں دعویٰ کیا تھا کہ ہمدرد کمپنی اپنے منافع کو مساجد اور مدارس کی تعمیر کے لیے استعمال کر رہی ہے۔ ہمدرد نے ان تبصروں کو ہتک آمیز قرار دیتے ہوئے دہلی ہائی کورٹ میں درخواست دائر کی تھی۔ لائیو لا کی رپورٹ کے مطابق اس معاملے میں ہمدرد کی جانب سے سینئر وکیل مکل روہتگی پیش ہوئے۔ انہوں نے دہلی ہائی کورٹ سے کہا، 'یہ ایک چونکا دینے والا معاملہ ہے، جو نہ صرف روح افزا کو بدنام کرنے کا معاملہ ہے بلکہ 'فرقہ وارانہ تقسیم' کا بھی ہے۔ انہوں نے کہا کہ رام دیو کا تبصرہ نفرت انگیز تقریر کے مترادف ہے۔

Source: akhbarmashriq