اسرائیلی وزیرِ اعظم بنجمن نیتن یاھو نے جمعرات کو جنوبی اسرائیل کے شہر بئر السبع میں ایرانی میزائل حملوں کے بعد گفتگو کرتے ہوئے کہا کہ ان کا ملک ایرانی جوہری خطرے کو ختم کرنے کے لیے پرعزم ہے۔ انہوں نے یہ بیان اس وقت دیا جب ایرانی میزائل حملے سوروکا ہسپتال کو نشانہ بنا چکے تھے۔ نیتن یاھو نے امریکی صدر ڈونلڈ ٹرمپ کو "یہودی عوام اور اسرائیلی ریاست کا دوست" قرار دیتے ہوئے کہا کہ اسرائیل ٹرمپ کے ہر اس فیصلے کی حمایت کرے گا جو وہ ایران کے خلاف جنگ میں کرے گا۔ انہوں نے واضح کیا کہ "ڈونلڈ ٹرمپ اسرائیل کی ایرانی اہداف کے خلاف کارروائیوں کی بھرپور حمایت کر رہے ہیں"۔ نیتن یاھو کا کہنا تھا کہ "امریکا نہ صرف ہماری مدد کر رہا ہے بلکہ ہماری فضائی حدود کے دفاع میں بھی شریک ہے"۔ انہوں نے دعویٰ کیا کہ امریکی پائلٹ اسرائیلی طیاروں کے ساتھ فضائی مشن میں حصہ لے رہے ہیں"۔ بات ختم کرتے ہوئے نیتن یاھو نے ایک بار پھر ایرانی جوہری پروگرام کو اسرائیلی ریاست کے لیے براہِ راست خطرہ قرار دیا اور کہا کہ "جنگوں میں صرف باتیں نہیں، بلکہ عملی اقدامات ہی اصل جواب ہوتے ہیں"۔ یہ بیانات اس وقت سامنے آئے ہیں جب ایران نے جمعرات کی صبح بئر السبع اور تل ابیب کے قریب واقع قصبوں رامات گان اور آزور پر میزائل داغے۔العربیہ اور الحدث کے نامہ نگار کے مطابق ایرانی میزائل حملوں میں 220 سے زائد اسرائیلی شہری زخمی ہوئے۔ دوسری جانب باخبر ذرائع نے بتایا ہے کہ امریکی اعلیٰ حکام آئندہ چند دنوں میں ایران کے خلاف ممکنہ حملے کی تیاری کر رہے ہیں۔ بلومبرگ نیوز کے مطابق ایسے منصوبے زیر غور ہیں جن پر آئندہ ہفتے کے آغاز میں عمل ہو سکتا ہے، تاہم ذرائع کا یہ بھی کہنا ہے کہ صورتِ حال مسلسل بدل رہی ہے، اس لیے حتمی فیصلہ ہونا ابھی باقی ہے۔

Source: social media