ایران کی جانب سے تل ابیب اور جنوبی اسرائیل پر میزائل حملوں کے بعد ایرانی پاسداران انقلاب نے دعویٰ کیا ہے کہ اب اسرائیل میں کوئی جگہ محفوظ نہیں رہی۔ پاسداران انقلاب نے جمعرات کے روز جاری کردہ بیان میں کہا کہ اسرائیلی فضائیں ان کے لیے پوری طرح کھلی ہوئی ہیں اور اب اسرائیل ایران کے آئندہ حملوں کا سامنا کرنے کے قابل نہیں رہا۔ بیان میں مزید کہا گیا کہ "ہم پہلے ہی خبردار کرچکے تھے کہ مقبوضہ علاقوں کی فضائیں غیر محفوظ ہو چکی ہیں اور اب اسرائیل میں کہیں بھی پناہ لینا ممکن نہیں۔ ہم اس صہیونی وجود جو اب ایک بے جان لاش ہے، کو خبردار کرتے ہیں کہ وہ ہماری اہدافی ضربات کا سامنا نہیں کرسکے گا"۔ ایرانی پاسداران انقلاب نے الزام لگایا کہ اسرائیلی فوج نے اپنی عسکری تنصیبات خالی کرکے دفاعی نظام شہری آبادی کے درمیان نصب کر دیا ہے۔ ان کے بقول "تمام عسکری مراکز کو خالی کر دیا گیا ہے اور اسرائیلی فوج جو اب رہائشی علاقوں کے پیچھے چھپ گئی ہے، نے اپنے ناکارہ دفاعی نظام شہروں کے بیچ نصب کر دیے ہیں"۔ یہ بیان ایسے وقت پر سامنے آیا ہے جب ایران نے دعویٰ کیا ہے کہ جنوبی اسرائیل میں سوروکا ہسپتال پر میزائل حملے کا اصل نشانہ ایک اسرائیلی فوجی و انٹیلی جنس بیس تھی۔ ایرانی سرکاری میڈیا کے مطابق "حملے کا براہِ راست اور درست ہدف اسرائیلی افواج کی قیادت اور انٹیلی جنس کا مرکز تھا، جو سوروکا ہسپتال کے قریب واقع گیو یام ٹیکنالوجی کمپلیکس میں موجود ہے۔ اس حملے میں ہسپتال صرف بم دھماکے کی شدت سے متاثر ہوا"۔

Source: social media