لوک سبھا میں تعلیم سے متعلق امور پر بحث کے دوران کانگریس رکنِ پارلیمنٹ پرینکا گاندھی واڈرا کے ایک بیان نے نیا سیاسی تنازع کھڑا کر دیا۔ پرینکا گاندھی نے مبینہ طور پر آئی آئی ٹی مدراس کے ڈائریکٹر پروفیسر وی کامکوٹی کے لیے ’گاؤ موتر ایکسپرٹ‘ کی اصطلاح استعمال کی۔ اس بیان کے بعد سیاسی بیان بازی تیز ہو گئی، جبکہ پروفیسر کامکوٹی کی تعلیمی قابلیت، تحقیقی کام اور سائنسی خدمات بھی بحث کا موضوع بن گئیں۔ جنوری 2025 میں آئی آئی ٹی مدراس کے ڈائریکٹر پروفیسر وی. کاماکوٹی نے چنئی میں ماتو پونگل کے ایک پروگرام میں گائے کے پیشاب کی مبینہ طبی خصوصیات کا ذکر کیا۔ انہوں نے کہا کہ گوموتر میں ’اینٹی بیکٹیریل‘ اور ’اینٹی فنگل‘ خصوصیات ہوسکتی ہیں اور یہ بعض مسائل، جیسے ہاضمے کی خرابی اور آئی بی ایس ، میں فائدہ مند ہوسکتا ہے۔ انہوں نے ایک سنیاسی کی کہانی بھی سنائی جس میں دعویٰ کیا گیا کہ گوموتر پینے سے اس کا بخار ٹھیک ہوگیا۔ ان بیانات کے بعد سوشل میڈیا اور سیاسی حلقوں میں بحث شروع ہوگئی۔ کچھ لوگوں نے اسے روایتی ہندوستانی علم کا حصہ قرار دیا، جبکہ کئی طبی ماہرین اور سیاسی مخالفین نے اسے سائنسی شواہد کے بغیر دعویٰ قرار دیا۔ پرینکا گاندھی کا یہ جملہ بنیادی طور پر طنزیہ تھا۔ ان کا مقصد یہ کہنا تھا کہ ایک اعلیٰ تعلیمی ادارے کے سربراہ کو جدید سائنس، تحقیق اور تعلیم کے موضوعات پر توجہ دینی چاہیے، نہ کہ ایسے دعوے کرنے چاہئیں جن پر طبی دنیا میں اتفاق رائے موجود نہیں ہے۔ کانگریس اور دیگر اپوزیشن لیڈروں نے الزام لگایا کہ آئی آئی ٹی جیسے ادارے کے سربراہ کی طرف سے ایسے بیانات سائنسی مزاج کے خلاف جاتے ہیں۔ کانگریس رہنما کارتھی چدمبرم نے بھی کاماکوٹی کے بیان کو تنقید کا نشانہ بنایا تھا۔ پروفیسر کاماکوٹی نے اپنے بیان کا دفاع کرتے ہوئے کہا کہ ان کے تبصرے کچھ تحقیقی مطالعات اور روایتی ہندوستانی طریقہ علاج سے متعلق تھے۔ انہوں نے کہا کہ گوموتر کے بعض اجزا پر تحقیق موجود ہے اور وہ اپنے ذاتی تجربے کی بات کر رہے تھے، نہ کہ کسی سرکاری طبی ہدایت کی۔

Source: Admin