International

پرتگال میں برقع قانون کے تحت پورے چہرے کے نقاب پر پابندی

19/08/26

پرتگال کے صدر نے عوام میں چہرہ چھپانے پر پابندی عائد کرتے ہوئے ایک قانون نافذ کیا ہے جس پر انتہائی دائیں بازو نے کافی زور دیا تھا۔ اس کے بارے میں کہا جا رہا ہے کہ یہ پورے چہرے کا نقاب پہننے والی مسلم خواتین کو وسیع پیمانے پر نشانہ بنائے گا۔

صدر انتونیو جوز سیگورو نے ایک بیان میں کہا، "چہرے کو انسانی شناخت اور رابطے کا مرکزی عنصر سمجھا جانا چاہیے۔"

متن کا حتمی ورژن جسے مقامی میڈیا نے "برقعہ قانون" قرار دیا ہے، کو پارلیمان نے جولائی میں دائیں بازو کے حکومتی اتحاد اور انتہائی دائیں بازو کے ووٹوں سے منظور کیا تھا جبکہ بائیں بازو کی جماعتوں نے اس کے خلاف ووٹ دیا تھا۔

قانون عوامی مقامات پر چہرہ چھپانے یا شناخت روکنے کے لیے ڈیزائن کیے گئے لباس پہننے نیز کسی بھی شخص کو اس کی مرضی کے خلاف جنس، مذہب، عمر یا اپنے اصل مقامِ پیدائش سے متعلق وجوہات کی بنا پر اپنا چہرہ ڈھانپنے پر مجبور کرنے پر پابندی ہے۔

حقوق کی مہم چلانے والوں نے طویل عرصے سے نشاندہی کی ہے کہ خواتین کو یہ بتا کر کہ انہیں کیا پہننا ہے، اس طرح کی پابندیاں مؤثر طریقے سے ان کے حقوق سلب کرتی ہیں۔

سیگورو نے تسلیم کیا کہ یہ "انتہائی معاشرتی و ثقافتی حساسیت" کا حامل ایک مسئلہ ہے۔

پرتگال میں خلاف ورزی کرنے والوں کو 150 سے 3,000 یورو تک کے جرمانے کا سامنا کرنا پڑتا ہے۔ تاہم صحت، پیشہ ورانہ، فنکارانہ یا موسم سے متعلقہ ضروریات نیز عبادت گاہوں، سفارتی مشنز اور ہوائی جہازوں میں بھی اس معاملے میں استثنیٰ دیا جاتا ہے۔

Source: Admin