مرکزی وزیر داخلہ امت شاہ نے اتوار کو ایک اہم میٹنگ کرتے ہوئے ہونے والی مردم شماری کی تیاریوں کا جائزہ لیا اور اہم معلومات شیئر کیں۔ سوشل میڈیا پلیٹ فارم ’ایکس‘ پر پوسٹ کرتے ہوئے انھوں نے بتایا کہ ملک میں 16ویں مردم شماری کا نوٹیفکیشن کل (پیر) کو جاری کیا جائے گا۔ اس بار مردم شماری خاص ہوگی کیوں کہ ہندوستان کی تاریخ میں پہلی بار ذات پات کی بنیاد پر مردم شماری کی جائے گی۔ وزیر داخلہ نے کہا کہ مردم شماری کی اس بڑی مہم کو کامیابی سے مکمل کرنے کے لیے 34 لاکھ شمار کنندگان اور نگرانوں کو تعینات کیا جا رہا ہے۔ اس کے علاوہ تقریباً 1.3 لاکھ مردم شماری افسران کی ٹیم اس کام میں شامل ہوگی۔ خاص بات یہ ہے کہ اس بار مردم شماری مکمل طور پر ڈیجیٹل پلیٹ فارم کے ذریعے کی جائے گی، جس میں جدید موبائل ڈیوائسز استعمال کی جائیں گی۔ وزیر داخلہ امت شاہ کے اس اعلان کے بعد سیاسی حلقوں میں بھی ہلچل مچ گئی ہے۔ ملک میں ذات پات پر مبنی مردم شماری کا ایک دیرینہ مطالبہ تھا، خاص طور پر سماجی انصاف کی وکالت کرنے والی تنظیموں اور سیاسی جماعتوں کی طرف سے۔ اب اس فیصلے کو مرکزی حکومت کا بڑا اقدام مانا جا رہا ہے۔ مردم شماری 2025 کی اس مہم کو ملک کے سماجی تانے بانے کو سمجھنے اور پالیسی سازی کو مزید جامع بنانے کی جانب ایک بڑا قدم قرار دیا جا رہا ہے۔

Source: social media