وقف ترمیمی بل کو سپریم کورٹ میں چیلنج کرنے کی تیاریاں شروع کر دی گئی ہیں۔ تمل ناڈو کے وزیر اعلیٰ ایم کے اسٹالن کے بعد اب کانگریس نے جمعہ کو کہا کہ وہ پارلیمنٹ میں منظور شدہ وقف (ترمیمی) بل 2024 کی آئینی حیثیت کو بہت جلد سپریم کورٹ میں چیلنج کرے گی۔ اس بل کو جمعہ کی صبح پارلیمنٹ نے منظوری دے دی۔ پہلے اسے لوک سبھا اور پھر راجیہ سبھا نے منظور کیا۔ جنرل سکریٹری جے رام رمیش نے کہا، "کانگریس بہت جلد وقف (ترمیمی) بل 2024 کی آئینی حیثیت کو سپریم کورٹ میں چیلنج کرے گی۔" انہوں نے کہا، 'ہمیں مکمل اعتماد ہے۔ ہم ہندستان کے آئین میں درج اصولوں، دفعات اور طریقوں پر وزیر اعظم نریندر مودی کی حکومت کے تمام حملوں کی مخالفت کرتے رہیں گے۔ جے رام رمیش نے کہا کہ کانگریس کے ذریعہ سی اے اے 2019 کو چیلنج سپریم کورٹ میں زیر سماعت ہے۔ سپریم کورٹ آر ٹی آئی ایکٹ 2005 میں 2019 کی ترامیم کو کانگریس کے چیلنج کی بھی سماعت کر رہی ہے۔ کنڈکٹ آف الیکشن رولز (2024) میں ترامیم کے جواز کو کانگریس کے چیلنج پر بھی سماعت جاری ہے۔ اسی طرح، عبادت گاہوں کے قانون 1991 کی بنیادی روح کو برقرار رکھنے کے لیے کانگریس کی مداخلت پر سپریم کورٹ میں ایک مقدمہ زیر التوا ہے۔

Source: social media