پانگ یانگ(10 ستمبر 2026): شمالی کوریا نے یورینیم کی افزودگی کی صلاحیت بڑھانے کے لیے ایک نئی تنصیب کی تعمیر مکمل کر لی۔

شمالی کوریا نے یورینیم کی افزودگی کی صلاحیت بڑھانے کے لیے ایک نئی تنصیب کی تعمیر مکمل کر لی ہے، جس پر عالمی جوہری توانائی ایجنسی (آئی اے ای اے) نے شدید تشویش کا اظہار کیا ہے۔

عالمی جوہری توانائی ایجنسی کے مطابق شمالی کوریا نے اپنے اہم یونگ بیون جوہری کمپلیکس میں توسیع کا کام مکمل کر لیا ہے۔

اس نئے تعمیر شدہ حصے میں سینٹری فیوجز کے اٹھائیس یونٹ نصب کیے جانے کی گنجائش موجود ہے، جو ملک کے جوہری پروگرام میں اضافے کی واضح عکاسی کرتا ہے۔

رپورٹس میں یہ بھی بتایا گیا ہے کہ کانگ سون نیوکلیئر پلانٹ کے توسیع شدہ حصے کو بھی فعال کیا جا رہا ہے، جس سے شمالی کوریا کی جوہری ہتھیاروں کے لیے مواد تیار کرنے کی صلاحیت میں مزید اضافہ ہونے کا خدشہ ہے۔

آئی اے ای اے نے شمالی کوریا کی جانب سے جوہری سرگرمیوں میں مسلسل اضافے اور بین الاقوامی قراردادوں کی خلاف ورزیوں پر سخت تشویش کا اظہار کرتے ہوئے صورتحال پر کڑی نظر رکھی ہوئی ہے۔