Sports

کلکتہ فٹبال لیگ: محمدن اسپورٹنگ نے سرچی سنگھا کو دو گول نل سے پچھاڑا، ناقابلِ شکست رہنے کا سلسلہ برقرار

30/07/26

کلکتہ:محمڈن اسپورٹنگ کلب نے کلکتہ فٹبال لیگ میں اپنی شاندار کارکردگی کا تسلسل برقرار رکھتے ہوئے جمعرات کے روزمحمڈن اسپورٹنگ گراو¿نڈ میں کھیلے گئے میچ میں سرچی سنگھا کو 2-0 سے ایک یکطرفہ اور شاندار مقابلے میں شکست دے دی۔ میچ کے پہلے ہاف میں دونوں ٹیموں کے درمیان زبردست اور سخت مقابلہ دیکھنے کو ملا۔ دونوں جانب سے گول کرنے اور برتری حاصل کرنے کی سرتوڑ کوششیں کی گئیں اور کئی زبردست موقع بنائے گئے، تاہم دونوں ٹیموں کا دفاع مضبوط ثابت ہوا اور پہلا ہاف بغیر کسی گول کے برابر رہا۔ پہلے ہاف کے بعد میدان میں اترتے ہی محمڈن اسپورٹنگ کی ٹیم بالکل الگ انداز اور نئے عزم کے ساتھ نظر آئی۔ میچ کے دوسرے ہاف کے آغاز میں ہی ٹیم کو پہلی کامیابی ملی جب رمسانگا نے شاندار پاس پر بہترین ہیڈر کے ذریعے گیند کو جال کی راہ دکھائی اور اپنی ٹیم کو 1-0 کی مستحق برتری دلا دی۔ ابھی اس گول کا جشن ختم ہی نہیں ہوا تھا کہ چند منٹوں بعد ہی محمد فردین علی ملا نے انتہائی مہارت کے ساتھ ایک اور گول داغ کرمحمڈن اسپورٹنگ کی برتری کو 2-0 کر دیا۔ اس دوسرے گول نے میچ پر محمڈن اسپورٹنگ کی گرفت مکمل طور پر مضبوط کر دی اور یہی اسکور وسل بجنے تک برقرار رہا۔ اس فتح کے ساتھ ہی محمدن اسپورٹنگ کلب نے اس سیزن کے کلکتہ فٹبال لیگ میں اپنے چار میچوں میں سے تیسری جیت درج کر لی ہے، جبکہ ایک میچ ڈرا رہا تھا۔ لیگ میں اب تک نا قابلِ شکست رہنے کی یہ روایت ٹیم کے بڑھتے ہوئے اعتماد اور تسلسل کی عکاسی کرتی ہے۔محمڈن اسپورٹنگ کی نظریں اب اپنے اگلے مقابلے پر جم گئی ہیں، جہاں وہ اسی کامیابی کی لہر کو برقرار رکھتے ہوئے اپنے سفر کو مزید آگے بڑھانے کے لیے پرعزم ہیں۔

Source: Admin