جے پور، 3 اکتوبر : راجستھان ہائی کورٹ نے ادے پور کے معروف کنہیا لال قتل معاملے سے متعلق کیس میں پانچ ملزمان کو ضمانت دینے سے انکار کرتے ہوئے ان کی درخواستیں مسترد کر دی ہیں۔
چیف جسٹس سنجے کے . اگروال اور جسٹس سمیر جین کی بنچ نے ہفتہ کو یہ حکم جاری کیا۔ عدالت نے جے پور کی این آئی اے مقدمات کی خصوصی عدالت کی جانب سے 2024 میں ضمانت دینے سے انکار کے احکامات کو برقرار رکھا۔
عدالت نے وسیم علی، مسلم خان، محسن خان، محمد محسن اور آصف حسین کی جانب سے دائر الگ الگ درخواستوں پر سماعت کرتے ہوئے کہا کہ معاملے میں دستیاب استغاثہ کے مواد کی بنیاد پر غیر قانونی سرگرمیوں کی روک تھام کے قانون (یو اے پی اے ) کی دفعہ 43D(5) کے تحت ضمانت پر قانونی پابندی عائد ہوتی ہے ۔
عدالت نے یہ بھی مدنظر رکھا کہ معاملے کی سماعت فعال طور پر آگے بڑھ رہی ہے ۔ ایسی صورت میں محض طویل عرصے سے جیل میں بند ہونے کی بنیاد پر آئین کے آرٹیکل 21 کے تحت ضمانت دینے کی بنیاد نہیں بنتی۔ اس بنیاد پر عدالت نے ملزمان کو راحت دینے سے انکار کر دیا۔
بنچ نے اپنے حکم میں دہشت گردی، قانون کی حکمرانی اور ریاست کی سلامتی سے متعلق پہلو¶ں پر بھی بحث کی۔ عدالت نے واضح کیا کہ ضمانت کے سوال پر غور کرتے وقت یو اے پی اے کی خصوصی دفعات اور معاملے میں دستیاب استغاثہ کے مواد کو مدنظر رکھنا ضروری ہے ۔
قابل ذکر ہے کہ ادے پور میں 28 جون 2022 کو درزی کنہیا لال کے قتل کے معاملے کی تحقیقات قومی تحقیقاتی ایجنسی (این آئی اے ) نے کی تھیں۔ پانچوں ملزمان نے خصوصی عدالت کی جانب سے ضمانت نہ دیے جانے کے فیصلوں کو ہائی کورٹ میں چیلنج کیا تھا۔