اسرائیلی پاپولیشن اینڈ امیگریشن اتھارٹی نے وزیرِ خارجہ گیدون ساعر کی درخواست پر یورپی پارلیمنٹ کے دو ارکان کو ملک میں داخلے سے روک دیا۔

سویڈش لیفٹ پارٹی کے ایم ای پیز یوناس سیوستدت اور ہنا گیڈن کو اتوار کی رات ان کے طے شدہ سفر سے قبل اسرائیل میں داخلے سے منع کر دیا گیا۔

سیوستدت نے اپنے فیس بک پیج پر کہا، یہ پابندی "غزہ میں اسرائیل کی نسل کشی پر تنقید اور ذمہ داروں کو بین الاقوامی انصاف کے کٹہرے میں لانے" کا مطالبہ کرنے کی بنا پر لگائی گئی۔

اسرائیلی کینیسٹ نے 2025 میں ایسے لوگوں کو روکنے کے لیے ملک میں داخلے کا قانون محدود کر دیا تھا جو جنگی جرائم کے لیے غیر ملکی عدالتوں میں اسرائیلی شہریوں کے خلاف مقدمہ چلانے کی اعلانیہ حمایت کرتے ہیں۔

دونوں ایم ای پیز نے سیو دی چلڈرن کے کارکنان، فلسطینی پناہ گزین کیمپوں اور فلسطینی اتھارٹی کے حکام سمیت اسرائیلی اور فلسطینی انسانی حقوق کے گروپوں سے ملاقات کے لیے مقبوضہ مغربی کنارے اور مشرقی یروشلم کا دورہ کرنے کا ارادہ کیا تھا۔

گیڈن نے اپنے فیس بک پیج پر کہا، "اسرائیلی حکومت ان بچوں کے ساتھ ہماری ملاقاتوں سے خوفزدہ ہے جو بدسلوکی اور تشدد کا شکار ہیں۔"

انہوں نے کہا، "یہ ایک بڑا مسئلہ ہے کہ اسرائیل کی انتہائی دائیں بازو کی حکومت کے ناقدین کو بولنے کی اجازت نہیں ہے اور صحافیوں، امدادی تنظیموں اور مبصرین کو غزہ یا مقبوضہ مغربی کنارے میں جانے کی اجازت نہیں ہے۔

گیڈن اور سیوستدت وہ تازہ ترین غیر ملکی اہلکار ہیں جنہیں اسرائیل میں داخلے سے روکا گیا ہے جس نے غزہ میں اپنی فوجی مہم کے ناقدین کے خلاف سخت اقدامات کیے ہیں۔ اسرائیل فلسطینی ساحلی علاقوں میں غیر ملکی صحافیوں کے داخلے سے ہنوز انکار کرتا ہے جہاں اس کے فوجی مظالم کے نتیجے میں کم از کم 73,420 فلسطینی جاں بحق اور 174,369 دیگر زخمی ہو چکے ہیں۔

Source: Admin