ایرانی پاسدارانِ انقلاب فورس نے امریکی عوام کے نام کُھلے خط میں عوام کو ٹرمپ انتظامیہ کو اقتدار سے ہٹانے کا مشورہ دے دیا۔

پاسدارانِ انقلاب کے خط کے متن کے مطابق ایران اور امریکا مل جُل کر پُرامن طریقے سے رہ سکتے ہیں، امریکی عوام موجودہ صورتِ حال کے ذمے دار دھوکے باز اور پُرتشدد امریکی سیاستدانوں کو اقتدار سے ہٹائیں۔

خط میں کہا گیا ہے کہ امریکی عوام اپنے معاملات چالاک و عیار لوگوں کے بجائے دانا افراد کے سپرد کریں، امریکی عوام اپنے مستقبل کا فیصلہ خود کریں، امریکی عوام فلسطین پر قبضہ کرنے والوں کو اپنی حکومت سے دور رکھیں۔

پاسدارانِ انقلاب کا کہنا ہے کہ امریکی حکومت پر اسرائیل سے دوری اختیار کرنے کے لیے دباؤ ڈالیں، امریکی عوام اپنے سیاست دانوں کو سمجھائیں کہ دنیا اب بدل چکی ہے۔

خط کے متن کے مطابق وہ دور ختم ہو گیا جب امریکا فوجی طاقت سے دیگر ممالک کی دولت لوٹتا تھا، امریکا بدستور برے راستے پر چلے گا تو اسے تکلیف دہ انجام کا سامنا کرنا پڑے گا۔