ناگپور: مہاراشٹرا کے ناگپور میں ایک واٹر ٹریٹمنٹ پلانٹ میں پیر کے روز علی الصبح کلورین گیس کے اخراج (لیک ہونے) کے بعد 40 افراد کو اسپتال میں داخل کرایا گیا ہے۔ پولیس حکام نے بتایا کہ یہ واقعہ رات کے تقریباً 1:00 بجے ناگپور کے گودھنی علاقے میں واقع مہاراشٹرا جیون پرادھیکرن کے گودھنی میونسپل کونسل واٹر ٹریٹمنٹ پلانٹ میں پیش آیا۔ بتایا جا رہا ہے کہ 900 کلوگرام صلاحیت والے سلنڈر سے اچانک کلورین گیس لیک ہونے لگی۔

کلورین گیس جیسے ہی آس پاس کے رہائشی علاقوں میں تیزی سے پھیلی، پورے علاقے میں افراتفری مچ گئی۔ کئی لوگوں کو کھانسی اور سانس لینے میں دشواری ہونے لگی، جس کے بعد نیشنل ڈیزاسٹر ریسپانس فورس (NDRF) نے فوری طور پر بچاؤ مہم شروع کی۔
مقامی پولیس اور انتظامی حکام نے فوری طور پر آس پاس رہنے والے لوگوں کو الرٹ کیا اور انہیں محفوظ مقامات پر منتقل ہونے کا مشورہ دیا۔ متاثرہ افراد میں سے کچھ کو علاج کے لیے فوری طور پر زنگابائی ٹاکلی کے سپرش اسپتال اور میو اسپتال منتقل کیا گیا۔

مانکاپور پولیس اسٹیشن کے پولیس انسپکٹر ہریش کلسیکر نے کہا، 'بچاؤ مہم کے دوران جائے وقوعہ کے آس پاس 200 میٹر کے دائرے کو 'نو مینز لینڈ' قرار دے کر بیریکیڈنگ کر دی گئی تھی۔ رہائشیوں کو اپنے گھر خالی کرنے کا مشورہ دیا گیا اور انہیں محفوظ علاقے میں منتقل کیا گیا۔'

کلسیکر نے کہا، 'ابھی 90 فیصد گیس کے اخراج (لیکج) کو روک دیا گیا ہے اور 40 افراد کا اسپتال میں علاج چل رہا ہے۔ اس کے علاوہ، 12 لوگوں کو چھٹی بھی دے دی گئی ہے۔' الرٹ ملنے کے بعد ناگپور میونسپل کارپوریشن کے فائر ڈیپارٹمنٹ نے دو واٹر ٹینڈر اور بریدنگ اپریٹس (سانس لینے کے آلات) سے لیس ملازمین کو جائے وقوعہ پر بھیجا۔

اورنج سٹی واٹر کے ملازمین کو بھی بلایا گیا اور نیشنل ڈیزاسٹر ریسپانس فورس کی ایک ٹیم کو بھی جائے وقوعہ پر تعینات کیا گیا۔ پولیس انسپکٹر نے یہ بھی کہا کہ صورتحال قابو میں ہے اور گھبرانے کی کوئی ضرورت نہیں ہے۔ انہوں نے یہ بھی بتایا کہ اس واقعے میں ایک کتے کی موت ہو گئی ہے۔


لیکج کی شدت کم ہونے کے بعد صبح تقریباً 5:30 بجے مشترکہ بچاؤ مہم ختم ہوئی۔ این ڈی آر ایف، فائر ڈیپارٹمنٹ اور او سی ڈبلیو کے ایمرجنسی ملازمین نے 900 کلوگرام کے کلورین سلنڈر کو کامیابی سے وہاں سے ہٹایا اور زہریلی گیس کو محفوظ طریقے سے بے اثر کرنے کے لیے ضروری حفاظتی اقدامات مکمل کیے۔

Source: Admin