ایران نے اب سے کچھ دیر پہلے اسرائیل پر میزائلوں سے ایک اور بڑا حملہ کردیا ہے۔ حملوں میں اسرائیلی دارلحکومت تل ابیب اور حیفہ کو نشانہ بنایا گیا ہے۔ ایرانی میڈیا کے مطابق حیفہ ریفائنری کی پیداوار مکمل طور پر روک دی گئی ہے، آپریشن وعدہ صادق سوم کے تحت تازہ حملے ان مقبوضہ فلسطینی علاقوں پر بھی کیے گئے ہیں جو اسرائیل کے زیر تسلط ہیں۔ ایرانی خبر ایجنسی کا دعویٰ ہے کہ اسرائیلی ایف 35 طیارہ تبریز میں مار گرایا گیا۔ اسرائیلی فوج نے کہا ہے کہ کسی ایف 35 طیارے کے گرنے کا علم نہیں۔ ایرانی میڈیا کی رپورٹ میں بتایا گیا ہے کہ ایران اسرائیل پر بڑے اور شدید میزائل حملے کی تیاری کر رہا ہے۔ ایرانی میڈیا کے مطابق اسرائیلی جارحیت نے ایران کو مجبور کردیا ہے کہ وہ اپنی قوم اور ملک کے دفاع میں یہ حملے جاری رکھے اور صیہونی مجرموں پر کاری ضرب لگائے۔ خبر رساں اداروں کے مطابق تازہ حملوں سے اسرائیل میں نقصان کی فوری طور پر تفصیلات سامنے نہیں آسکیں۔ اس سے پہلے ایران نے اسرائیل کا ایک اور ایف تھرٹی فائیو مار گرانے کا بھی دعوی کیا تھا۔ تازہ ایف تھرٹی فائیو تبریز میں گرانے کا دعوی کیا گیا ہے۔ ایرانی میڈیا کے مطابق اب تک مار گرائے گئے ایف تھرٹی فائیو کی تعداد چار ہوگئی ہے۔

Source: social media