تہران: ایرانی میڈیا نے دعویٰ کیا ہے کہ تہران کی جانب سے فائر کیے گئے زیادہ سے زیادہ میزائل اسرائیل میں اپنے اہداف پر کام یابی سے پہنچنے کی وجہ یہ ہے کہ اسرائیل کا آئرن ڈوم سسٹم ہیک کر لیا گیا ہے۔ تفصیلات کے مطابق اسرائیل کا فضائی دفاعی نظام آئرن ڈوم سسٹم ہیک ہو گیا ہے، ایرانی میڈیا کے مطابق ایران کے میزائیلوں کو روکنے کے لیے چلائے گئے اسرائیل کے بعض میزائل اپنے ہی علاقوں پر گرنے لگے ہیں، روئٹرز کی ایک ویڈیو میں تل ابیب سے داغا جانے والا اسرائیلی میزائل واپس گرتے دکھایا گیا۔ ارنا نیوز ایجنسی کے مطابق پیر کو لانچ کیے گئے میزائلوں اور ڈرونز نے اسرائیل میں بڑی تباہی مچائی اور لاکھوں اسرائیلیوں کو چوتھے روز بھی زیر زمین پناہ گاہوں میں چھپنا پڑا، اس دوران اسرائیلی آئرن ڈوم میزائل سسٹم کو ہیک کر لیا گیا تھا، جس کی وجہ سے اسرائیلی میزائل کنفیوژن اور نا اہلی میں ملک کے اندر ہی فائر ہوئے۔ اسرائیل میں سیل فون کیمروں سے حاصل کی گئی فوٹیجز میں بھی بڑی تعداد میں ایرانی میزائلوں کو اسرائیلی فضائی دفاعی نظام سے بغیر کسی رکاوٹ کے گزرتے اور زمین پر موجود اہداف کو نشانہ بناتے دکھایا گیا ہے۔ ایرانی میڈیا کا کہنا ہے کہ اسرائیل پر ایک اور سائبر حملہ بھی کیا گیا، پیر کے روز اسرائیل کے نیشنل سائبر ڈائریکٹوریٹ نے کہا کہ فوجی یونٹ کی طرف سے اسرائیلیوں کو ایسے ٹیکسٹ پیغامات بھیجے گئے ہیں جن میں شہریوں سے کہا گیا تھا کہ وہ عوامی بم پناہ گاہوں میں جانے سے گزیر کریں۔ یادر ہے کہ اسرائیلی حکومت نے 13 جون کو رات میں بلا اشتعال جارحیت کرتے ہوئے رہائشی عمارتوں سمیت ایرانی حدود کے اندر حملے شروع کیے، ٹارگٹڈ حملوں میں اعلیٰ ایرانی فوجی اہلکار مارے گئے، جس کے بعد ایران نے اسرائیل کے اندر گہرائی میں حملے شروع کیے، اور تل ابیب، یروشلم اور حیفا سمیت دیگر اہداف کو بیلسٹک میزائلوں اور ڈرونز سے نشانہ بنایا۔

Source: social media