ایران اور اسرائیل کے درمیان جاری کشیدگی نے خطے میں سلامتی کے شدید خدشات پیدا کر دیے ہیں۔ اسی تناظر میں ہندستان نے ایران میں موجود اپنے شہریوں کے لیے ایک تازہ ایڈوائزری جاری کی ہے۔ ہندستانی سفارت خانے نے شہریوں اور ہندستانی نژاد افراد سے اپیل کی ہے کہ وہ اگر ممکن ہو تو فوراً تہران شہر کو چھوڑ کر محفوظ مقامات پر منتقل ہو جائیں۔ سرکاری ذرائع کے مطابق، ایران کا فضائی علاقہ بند ہونے کی وجہ سے واپسی کا ہوائی راستہ فی الحال ممکن نہیں، اس لیے زمینی راستوں کے ذریعے طلبہ کو آرمینیا کے راستے نکالا جا رہا ہے۔ ابتدائی اطلاعات کے مطابق، تقریباً 100 ہندستانی شہری، جن میں زیادہ تر طلبہ ہیں، ایران سے نکل کر آرمینیا کی سرحد پر پہنچ چکے ہیں۔ ان میں تین یونیورسٹیوں کے طلبہ شامل ہیں جنہیں فی الحال محفوظ مقامات پر منتقل کر دیا گیا ہے۔ ہندستانی وزارتِ خارجہ نے اس صورتحال کے پیشِ نظر مکمل نگرانی اور کارروائی کا آغاز کر دیا ہے۔ تہران میں ہندستانی سفارت خانہ مسلسل سکیورٹی صورتحال پر نظر رکھے ہوئے ہے اور ایران میں موجود تمام ہندستانی طلبہ و شہریوں سے رابطے میں ہے۔ وزارت کے مطابق، کچھ طلبہ کو ایران میں ہی محفوظ مقامات پر پہنچایا جا چکا ہے اور دیگر طلبہ کو نکالنے کے لیے مختلف متبادل ذرائع پر بھی غور کیا جا رہا ہے۔ ہندستانی سفارت خانے نے اپنے سوشل میڈیا پلیٹ فارمز پر بھی ہدایات جاری کی ہیں جن میں کہا گیا ہے کہ ایران میں موجود تمام ہندوستانی شہری اور ہندوستانی نژاد افراد موجودہ کشیدہ حالات کو مدنظر رکھتے ہوئے محتاط رہیں، غیر ضروری سرگرمیوں سے گریز کریں، اور سفارت خانے کی جانب سے جاری کردہ اپ ڈیٹس اور مشوروں پر عمل کریں۔

Source: social media