امریکی صدر ڈونلڈ ٹرمپ نے کہا ہے کہ ’ہم نے انڈیا اور پاکستان کو جنگ سے روکا۔ میں سمجھتا ہوں کہ یہ (جنگ) ایٹمی تباہی میں بدل سکتی تھی۔‘ اوول ہاؤس میں پریس کانفرنس کرتے ہوئے امریکی صدر ڈونلڈ ٹرمپ نے کہا کہ ’میں انڈیا اور پاکستان کے رہنماؤں کا شکریہ ادا کرنا چاہتا ہوں اور میں اپنے لوگوں کا بھی شکریہ ادا کرنا چاہوں گا۔‘ انہوں نے کہا کہ اگر پاکستان اور بھارت کے درمیان دوبارہ جنگ ہوئی تو امریکہ کوئی سمجھوتہ نہیں کرے گا۔ امریکی صدر ڈونلڈ ٹرمپ نے کہا کہ امریکا بھارت اور پاکستان کے ساتھ تجارتی معاہدہ کرنے جا رہا ہے۔ مجھے اس پر فخر ہے۔ ہم گولیوں کے بجائے تجارت کے ذریعے ممکنہ ایٹمی جنگ کو روکنے میں کامیاب رہے۔ وہ گولیوں کے ذریعے کرتے ہیں۔ ہم اسے تجارت کے ذریعے کرتے ہیں۔ اس لیے مجھے اس پر بہت فخر ہے۔ اس پر کوئی بات نہیں کرتا۔ لیکن پاکستان اور بھارت کے درمیان ایک انتہائی خطرناک ممکنہ جنگ جاری تھی۔ اب حالات ٹھیک ہیں۔ انہوں نے کہا کہ ’ہم ان لوگوں کے ساتھ تجارت نہیں کر سکتے جو ایک دوسرے پر گولیاں برسا رہے ہوں اور ممکنہ طور پر جوہری ہتھیار استعمال کر رہے ہوں۔ وہ ان ممالک کے عظیم رہنما ہیں اور وہ سمجھ گئے اور متفق ہو گئے اور یہ سب رُک گیا۔ ہم دوسروں کو بھی لڑنے سے روک رہے ہیں۔‘ امریکی صدر نے کہا کہ ’ہم کسی سے بھی بہتر لڑسکتے ہیں ہمارے پاس دنیا کی سب سے بڑی فوج ہے۔‘ خیال رہے کہ انڈیا کی جانب سے پاکستان کے مختلف مقامات پر حملوں کے بعد پاکستان نے جواباً انڈیا میں کئی مقامات پر حملے کیے تھے۔ جس کے بعد سعودی عرب، امریکہ اور ترکیہ جنگ بندی کے لیے متحرک ہوئے تھے اور دونوں ممالک کے حکام کے درمیان بات چیت کے بعد جنگ بندی کا باقاعدہ اعلان کر دیا گیا تھا۔

Source: social media