Sports

شکیب الحسن کے گھر کو نذرِ آتش کرنے کی کوشش، توڑ پھوڑ بھی کی گئی

06/08/26

بنگلادیش کرکٹ ٹیم کے سابق کپتان اور سابق رکنِ پارلیمنٹ شکیب الحسن کے آبائی گھر پر نامعلوم افراد نے حملہ کرتے ہوئے اسے آگ لگانے کی کوشش کی۔

پولیس کے مطابق واقعہ منگل کی رات تقریباً 9 بجے ضلع ماگورا کے علاقے کیشب مور میں پیش آیا، جہاں حملہ آوروں نے گھر پر پتھراؤ کیا، کھڑکیوں کے شیشے توڑ دیے اور بعد ازاں گھر کو آگ لگانے کی کوشش کی۔

ماگورا صدر پولیس اسٹیشن کے افسر انچارج محمد عبداللّٰہ المامون نے بتایا کہ واقعے میں ملوث افراد کی فوری طور پر شناخت نہیں ہو سکی، تاہم واقعے کے بعد گھر کے اطراف پولیس تعینات کر دی گئی ہے اور تحقیقات جاری ہیں۔

خیال رہے کہ یہ واقعہ ایسے وقت پیش آیا جب سابق وزیراعظم شیخ حسینہ نے نئی دہلی میں فارن کوریسپونڈنٹس کلب آف ساؤتھ ایشیا کے زیر اہتمام میڈیا سے گفتگو کی، جس میں شکیب الحسن نے بھی شرکت کی۔

پولیس نے حملہ آوروں کی شناخت اور گرفتاری کے لیے تحقیقات شروع کر دی ہیں، جبکہ واقعے کی وجوہات کا بھی جائزہ لیا جا رہا ہے۔

یاد رہے کہ شیخ حسینہ 2024ء میں طلبہ کی قیادت میں ہونے والے احتجاجی مظاہروں کے نتیجے میں اپنی حکومت کے خاتمے کے بعد سے نئی دہلی میں خود اختیار کردہ جلاوطنی کی زندگی گزار رہی ہیں۔

انہیں 2025ء میں مظاہرین کے خلاف کریک ڈاؤن کے دوران انسانیت کے خلاف جرائم کے الزام میں سزائے موت سنائی گئی تھی، تاہم انہوں نے اس فیصلے کو قانونی حیثیت سے محروم قرار دیتے ہوئے مسترد کر دیا تھا۔

میڈیا رپورٹس کے مطابق 78 سالہ شیخ حسینہ ڈھاکا سے روانگی کے بعد آج پہلی مرتبہ عوامی سطح پر ویڈیو لنک کے ذریعے منظرِ عام پر آئیں۔

Source: Admin