National

پرتاپ گڑھ میں سو سال پرانا مکان زمین بوس، ایک ہی خاندان کے چھ افراد کی موت

06/08/26

پرتاپ گڑھ: اترپردیش کے پرتاپ گڑھ میں جمعرات کی صبح سویرے ایک ایسا دردناک حادثہ پیش آیا جس نے پورے علاقے کو غم زدہ کر دیا۔ نگر کوتوالی علاقے کے مہولی گاؤں میں تقریباً 100 سال پرانا خستہ حال مکان اچانک زمین بوس ہو گیا۔ حادثے کے وقت پورا خاندان گہری نیند میں تھا۔ دیکھتے ہی دیکھتے مکان موت کے ملبے میں تبدیل ہو گیا اور ایک ہی خاندان کے چھ افراد کی دردناک موت ہو گئی۔ جب کہ خاندان کا ایک رکن معجزاتی طور پر محفوظ رہا۔

جانکاری کے مطابق، مہولی گاؤں کے رہائشی پرمود شریواستو کا مکان برسوں پرانا اور انتہائی خستہ حال ہو چکا تھا۔ جمعرات کی صبح سویرے تقریباً ایک سے دو بجے کے بیچ اچانک پوری عمارت اچانک منہدم ہو گئی۔ تیز دھماکے اور چیخ و پکار سن کر گاؤں کے لوگ موقعے پر پہنچے اور فوری طور پر پولیس کو اطلاع دی۔ اطلاع ملتے ہی پولیس، فائر بریگیڈ اور انتظامی حکام امدادی اور بچاؤ ٹیم کے ساتھ موقعے پر پہنچے۔ مقامی لوگوں کی مدد سے گھنٹوں جاری رہنے والے ریسکیو آپریشن کے بعد ملبے میں دبے لوگوں کو باہر نکال کر ضلع اسپتال بھیجا گیا، لیکن ڈاکٹروں نے چھ افراد کو مردہ قرار دے دیا۔

ڈاکٹر نے اس حادثے میں پرمود شریواستو، ریتا شریواستو، نتن شریواستو، مادھوری شریواستو، مادھو اور ادوک کو مردہ قرار دے دیا۔ اس واقعے نے پورے گاؤں کو صدمے میں ڈال دیا۔ وہیں پرمود شریواستو کے بیٹے 28 سالہ امن خوش قسمتی سے بچ گئے۔ ان کی حالت معمول کے مطابق بتائی جا رہی ہے۔

Source: Admin