امیتابھ بچن اور ان کے بیٹے ابھیشیک بچن کا شمار بالی وڈ کے بڑے ان اداکاروں میں ہوتا ہے جن کے فیشن کو لوگ فالو کرتے ہیں۔ میڈیا کے مطابق بچن فیملی اپنی مہنگی گاڑیوں اور گھڑیوں سمیت اپنی لگژری لائف کے حوالے سے کافی مشہور ہیں۔ میڈیا رپورٹس کے مطابق دونوں اداکاروں کے ہاتھ میں اکثر دو گھڑیاں دیکھی جاتی ہیں جن پر ان کے مداح دو گھڑیاں پہننے کی وجہ جاننے کیلئے بےتاب رہتے ہیں۔ میڈیا کو دیے گئے ایک انٹرویو میں ابھیشیک نے اس کا خلاصہ کرتے ہوئے بتایا کہ یہ ان کے خاندان کا اسٹائل ہے، اور وہ دو گھڑیاں اپنی والدہ سے متاثر ہوکر پہنتے ہیں۔ انہوں نے بتایا کہ جب وہ اپنی تعلیم حاصل کرنے یورپ گئے تھے تو ان کی والدہ یورپ اور بھارت کے ٹائم کا اندازہ رکھنے کیلئے دو گھڑیاں پہنتی تھیں تاکہ وہ مجھ سے مقامی وقت کے مطابق بات چیت کر سکیں۔ اسی طرح ایک انٹرویو میں امیتابھ بچن بھی اپنی دو گھڑیاں پہننے کی عادت کے حوالے سے بات کر چکے ہیں جن کے مطابق وہ دو اور کبھی کبھی تین گھڑیاں بھی پہنتے ہیں اور ایسا وہ تفریح کے طور پر کرتے ہیں۔

Source: social media