بالی ووڈ کی سینئر اور عہد ساز اداکارہ وجنتی مالا کے بیٹے نے ان کی موت کی افواہوں کی تردید کرتے ہوئے کہا کہ وہ بالکل ٹھیک اور صحت مند ہیں۔ واضح رہے کہ جمعہ کو یہ افواہ اس وقت پھیلی جب بعض خبروں میں دعویٰ کیا گیا تھا کہ 91 سالہ اداکارہ و رقاصہ وجنتی مالا چل بسی ہیں لیکن انکے بیٹے سوچندرہ بالی نے مبینہ طور پر اپنے فیس بک اور واٹس ایپ پر وضاحت کرتے ہوئے کہا کہ وہ زندہ اور بالکل ٹھیک ہیں۔ اسی طرح گلوکار و موسیقار گری جے شنکر سندریسن نے بھی اپنے انسٹاگرام پر ان اطلاعات کی تردید کی۔ یاد رہے کہ اس سال جنوری میں وجنتی مالا نے چنئی کے کالا پرادرشینی ڈانس اسکول میں بھرتناٹیم پرفارم کیا تھا جس میں گری جے شنکر سندریسن نے گلوکاری کی تھی۔ سولہ برس کی عمر میں تامل سنیما سے اپنے کیریئر کا آغاز کرنے والی وجنتی مالا نے کیریئر میں اہم کامیابی 1954 کی رومانی فلم ’ناگن‘ سے حاصل کی تھی۔ 1955 کی فلم دیو داس میں انھوں نے چندرا مکھی کا کردار ادا کیا، اسکے علاوہ انھوں نے سنگم، جویل تھیف، آمرا پالی، گنوار اور متعدد ہٹ فلموں میں ماضی کے لیجنڈری اداکاروں کے مقابل کام کیا۔ 2024 میں انھیں بھارت سرکار کا دوسرا اعلیٰ ترین سویلین ایوارڈ پدما وبھوشن سے نوازا گیا۔

Source: social Media