نامور فلم ساز رام گوپال ورما نے مصنوعی ذہانت (اے آئی) کو فلم انڈسٹری کیلئے خطرہ قرار دے دیا۔

اپنی منفرد اور تکنیکی بنیادوں پر فلمیں بنانے کے لیے مشہور ڈائریکٹر رام گوپال ورما نے کہا ہے کہ آنے والے دور میں مصنوعی ذہانت کا استعمال سنیما کی دنیا میں ایک بہت بڑا انقلاب لائے گا۔

ان کا کہنا تھا کہ اے آئی تکنیک کی وجہ سے اب کسی ڈائریکٹر کو بڑے بجٹ، سیکڑوں کریو ممبران یا مہنگے سیٹس کی ضرورت نہیں رہے گی، جس سے نئے اور باصلاحیت لوگوں کو فلمیں بنانے کے یکساں مواقع ملیں گے۔

تاہم رام گوپال ورما کا ماننا ہے کہ اگرچہ فلم کا معیار اور مستقبل روشن دکھائی دیتا ہے، لیکن اس کی قیمت روایتی اسٹوڈیوز، بھاری رقم وصول کرنے والے اسٹارز اور فلمی عملے کے روزگار کی تباہی کی صورت میں ادا کرنا پڑے گی۔

نامور ہدایتکار کے مطابق آئندہ کچھ سالوں میں فلمیں اتنی سستی اور تیز رفتاری سے بنیں گی کہ فلم انڈسٹری کا موجودہ معاشی ماڈل مکمل طور پر بدل جائے گا۔