سیاست میں قائدین کے ذاتی لمحات شاذ و نادر ہی پوشیدہ رہتے ہیں۔ قائدِ حزبِ اختلاف راہل گاندھی کی ایک کشتی پر خاتون اور بچے کے ساتھ تصویر— جو بظاہر ان کی چھٹیوں کی معلوم ہوتی ہے— اس وقت سیاسی تنازع کی علامت بن گئی جب مرکزی وزیر گری راج سنگھ نے اسے سوشل میڈیا پلیٹ فارم پر پوسٹ کر دیا۔ گری راج سنگھ نے تصویر شیئر کرتے ہوئے لکھا:"راہول جی! یہ تصویر کہاں اور کب لی گئی؟ اور آپ کے ساتھ اس تصویر میں موجود یہ لوگ کون ہیں؟ میں جاننے کے لیے بے تاب ہوں!"اس پوسٹ کے بعد کانگریس نے مرکزی وزیر کو شدید تنقید کا نشانہ بنایا۔تصویر میں پرسکون موڈ میں نظر آنے والے راہل گاندھی کے ساتھ ایک خاتون (جس نے اسکارف اور دھوپ کا چشمہ پہن رکھا ہے) اور سویمنگ کاسٹیوم میں ملبوس ایک بچہ نظر آ رہا ہے جو راہل اور خاتون کے درمیان بیٹھا ہوا ہے۔تصویر پر شروع ہونے والے ہنگامے کے بعد کانگریس نے معاملے کی وضاحت کی۔ کانگریس کی ترجمان سپریہ شری نیت نے گری راج سنگھ کے رویے کی شدید الفاظ میں مذمت کرتے ہوئے کہا: "تصویر میں موجود خاتون اور بچہ راہل گاندھی کے دوست کی اہلیہ اور بیٹا ہیں۔ وہ سب ایک ساتھ فیملی ویکیشن پر گئے تھے۔ دوست تصویر میں موجود نہیں ہے۔ آپ کس قدر گھٹیا ذہنیت کے انسان ہیں جو ایک مرد اور عورت کو ساتھ دیکھ کر صرف غلط خیالات ہی لا سکتے ہیں۔ اپنے نفس کی محرومیوں کو خود پر حاوی نہ ہونے دیں۔"انڈین اوورسیز کانگریس (IOC) کے سوشل میڈیا انچارج اروند ڈانڈیا نے مزید تفصیلات دیتے ہوئے بتایا کہ یہ تصویر امریکہ کی ریاست ٹیکساس میں ’لیک رائے روبرٹس‘ پر لی گئی تھی۔ وہیں یوتھ کانگریس کے سابق صدر سرینیواس بی وی نے طنز کرتے ہوئے کہا:"بڑھاپے میں زیادہ تجسس اچھی بات نہیں ہے... کسی اچھے ڈاکٹر سے مشورہ لیں۔"یہ تنازع ایک ایسے وقت میں سامنے آیا ہے جب بی جے پی راہول گاندھی کے غیر ملکی دوروں کو لے کر ان پر مسلسل حملہ آور ہے۔ پارلیمنٹ کے مونسون سیشن سے کچھ دن قبل ہی راہول گاندھی تین ہفتوں کے بیرونِ ملک دورے (۲۲ جون سے ۱۳ جولائی) سے واپس لوٹے تھے۔ امیت مالویہ (بی جے پی آئی ٹی سیل چیف): انہوں نے سوال اٹھایا کہ راہول کہاں گئے تھے، کس سے ملے اور ان کے سفر اور قیام کے اخراجات کس نے برداشت کیے؟ کیا ان دوروں کے سیاسی یا اسٹریٹجک اثرات تھے؟ امیت ساطم (بی جے پی ممبئی صدر): انہوں نے سنگین الزام لگایا کہ راہول نے غیر ملکی دوروں کے دوران 'ہندستان کے دشمنوں' سے ملاقاتیں کیں تاکہ ملک میں افراتفری پھیلائی جا سکے۔ بی جے پی کا دعویٰ ہے کہ راہول گاندھی نے لندن، نیویارک، اٹلی، جرمنی، قطر، ویتنام، مالدیپ، دبئی اور عمان سمیت ۵۴ غیر ملکی دورے کیے ہیں۔ حکمران جماعت کے مطابق ان کے ۱۰ سال کے اعلان کردہ ۱۱ کروڑ روپے کے اثاثوں اور تقریباً ۶۰ کروڑ روپے کے تخمینے والے سفری اخراجات میں بڑا فرق ہے، جو ایک شدید فنڈنگ اسکینڈل کی طرف اشارہ کرتا ہے۔ اس کے علاوہ بی جے پی نے سیکیورٹی پروٹوکولز اور CRPF قواعد و ضوابط کی خلاف ورزی کا بھی الزام عائد کیا ہے۔

Source: Admin