انگلینڈ کے خلاف ایک روزہ میچ میں شاداب خان کا غصے میں لیا گیا ری ویو کام کرگیا۔

ری ویو میں گیند بیٹ سے ٹکراتی دیکھ کر تھرڈ امپائر نے شاداب خان کو ناٹ آؤٹ قرار دے دیا۔

نئی زندگی ملنے کے بعد شاداب خان اور حارث رؤف نے بقیہ 21 رنز حاصل کیے اور پاکستان کو تاریخی فتح دلا کر ٹرائی نیشن سیریز کے فائنل میں پہنچا دیا۔

میچ ونر شاداب خان نے کہا کہ انہیں اندازہ ہی نہیں ہوا کہ گیند بلے کا کنارہ لے کر گئی ہے۔ حارث رؤف نے اصرار کیا کہ ری ویو لینا چاہیے۔

میڈیا سے گفتگو میں شاداب خان کا کہنا تھا کہ حارث کے اصرار پر ری ویو لیا، اس وقت کافی مایوسی کا شکار تھا۔

انہو ں نے کہا کہ سلیکٹرز اور ٹیم مینجمنٹ نے جس اعتماد کا اظہار کیا، اس پر پورا اترنے کی خوشی ہے۔

حارث رؤف کا کہنا ہے کہ آخری لمحات میں شاداب سے یہی بات ہوئی تھی کہ میچ میں خود ختم کروں گا۔

انہوں نے کہا کہ شاداب خان نے جس انداز میں بیٹنگ کی وہ ورلڈ کلاس تھی، یہ کامیابی پاکستان کے عوام کے لیے بھی خوشی کا بڑا موقع ہے۔