Kolkata

شو بھندوکے دہلی دورے کی منسوخی کے بعد سدیپ بنرجی نبانہ پہنچے، تنہائی میں لمبی گفتگو

27/07/26

کلکتہ:ریاستی سیکریٹریٹ ’نبانا‘ میں وزیر اعلیٰ شوبھندو ادھیکاری اور ترنمول کانگریس چھوڑ کر این سی پی آئی میں شامل ہونے والے لوک سبھا رکن سدیپ بنرجی کے درمیان پیر کی رات ایک انتہائی اہم اور طویل ملاقات ہوئی۔ اگرچہ ابتدائی طور پر دونوں رہنماو¿ں نے میڈیا کے سامنے خاموشی اختیار کر رکھی تھی، تاہم ذرائع کے مطابق اس ملاقات میں اراکینِ پارلیمنٹ کی سیکیورٹی اور ترقیاتی فنڈز سے متعلق کئی اہم امور پر پیش رفت ہوئی ہے۔ شو بھندو ادھیکاری کو پہلے دہلی میں ترنمول سے الگ ہونے والے 20 اراکینِ پارلیمنٹ سے ملاقات کرنی تھی، تاہم مصروف شیڈول کے باعث ان کا دورہ منسوخ ہو گیا۔ اس کے بعد شمالی کلکتہ سے منتخب رکنِ پارلیمنٹ سدیپ بنرجی خو د شوبھندو ادھیکاری سے ملنے 'نبانا' پہنچے۔ ذرائع کے مطابق، دونوں رہنماو¿ں کے درمیان بنیادی گفتگو اس بات پر ہوئی کہ ایم پی فنڈ کی رقم کو ریاستی حکومت کے ساتھ بہتر تال میل کے ذریعے علاقوں کی ترقی کے لیے کیسے استعمال کیا جائے۔ سدیپ بنرجی نے شوبھندو سے اپیل کی کہ ترنمول چھوڑ کر این سی پی آئی میں آنے والے 20 اراکینِ پارلیمنٹ کو اپنے اپنے حلقوں میں ترقیاتی کام کرواتے وقت کسی قسم کی 'سیکیورٹی یا سیاسی رکاوٹ' کا سامنا نہ کرنا پڑے۔ انکشاف ہوا ہے کہ آنے والے مانسون سیشن میں یہ اراکینِ پارلیمنٹ کن مرکزی بلوں کی حمایت کریں گے اور ریاست سے جڑے کن اہم مسائل کو ایوان میں اٹھائیں گے، اس پر بھی تفصیلی تبادلہ خیال کیا گیا۔

Source: Admin