سرکاری اعداد و شمار نے فرانس کی مشکلیں بڑھا دیں ... شرحِ اموات شرحِ پیدائش سے تجاوز کر گئی

سرکاری اعداد و شمار سے انکشاف ہوا ہے کہ فرانس میں 2025 کے دوران، دوسری جنگِ عظیم کے خاتمے کے بعد پہلی بار شرحِ پیدائش کے مقابلے میں شرحِ اموات زیادہ رہی ہے۔ یہ ایک ایسی پیش رفت ہے جو فرانس کی اس آبادیاتی برتری کو ختم کر رہی ہے جو اسے دیگر یورپی ممالک کے مقابلے میں حاصل تھی۔ فرانسیسی قومی ادارے برائے شماریات و معاشی مطالعہ نے اعلان کیا ہے کہ گزشتہ سال 6 لاکھ 51 ہزار اموات ریکارڈ کی گئیں، جبکہ شرحِ پیدائش گر کر 6 لاکھ 45 ہزار رہ گئی۔ کورونا وائرس کی وبا کے بعد سے فرانس میں شرحِ پیدائش میں تیزی سے کمی واقع ہوئی ہے۔ روایتی طور پر فرانس کی آبادیاتی ساخت یورپ کے زیادہ تر ممالک کے مقابلے میں مضبوط رہی ہے، لیکن معمر افراد کی بڑی تعداد اور شرحِ پیدائش میں کمی ظاہر کرتی ہے کہ فرانس بھی اس آبادیاتی بحران سے محفوظ نہیں ہے جو پورے براعظم کے عوامی مالیاتی نظام پر بوجھ بن رہا ہے۔ خبر رساں ادارے "روئٹرز" کے مطابق انسٹی ٹیوٹ نے بتایا کہ گذشتہ سال زرخیزی کی شرح گر کر فی خاتون 1.56 بچے رہ گئی، جو عالمی جنگ کے بعد سے کم ترین سطح ہے۔ یہ شرح پینشن کی فنڈنگ کے تخمینوں میں لگائی گئی 1.8 کی شرح سے بھی بہت کم ہے۔ سال 2023 میں ... جو یورپی یونین کے تقابلی جائزوں کا تازہ ترین سال ہے ... فرانس 1.65 کی شرحِ زرخیزی کے ساتھ دوسرے نمبر پر تھا، جبکہ بلغاریہ 1.81 کی شرح کے ساتھ پہلے نمبر پر تھا۔

Source: social media