National

برلا نے شیو سینا (یو بی ٹی) کے چھ اراکین پارلیمنٹ کے انضمام کو دی منظوری، شندے گروپ کی تعداد بڑھ کر 13 ہوئی

19/07/26

نئی دہلی، 18 جولائی : لوک سبھا کے اسپیکر اوم برلا نے شیو سینا (یو بی ٹی) کے چھ اراکین پارلیمنٹ کے شری کانت شندے کی قیادت والی شیو سینا میں انضمام کو منظوری دے دی ہے ۔ لوک سبھا سکریٹریٹ سے ہفتہ کو جاری سرکلر میں 18 ویں لوک سبھا میں سیاسی پارٹیوں کی ترمیمی صورتحال جاری کی گئی ہے ۔ یہ ترمیم شیو سینا (ادھو گروپ) کے چھ اراکین پارلیمنٹ کی پارٹی وابستگی میں تبدیلی کے بعد کی گئی ہے ۔ اس فیصلے کے بعد لوک سبھا میں شندے گروپ کے اراکین پارلیمنٹ کی تعداد بڑھ کر 13 ہو گئی ہے ۔ اس سے پہلے گزشتہ ماہ ادھو ٹھاکرے کی قیادت والی شیو سینا نے لوک سبھا اسپیکر کو خط لکھ کر درخواست کی تھی کہ باغی اراکین پارلیمنٹ کی جانب سے پارلیمنٹ میں الگ پہچان کی کسی بھی مانگ پر غور نہ کیا جائے ۔ پارٹی نے اپنے خط میں انحراف مخالف قانون (دلبدل مخالف قانون) اور آئینی دفعات کا حوالہ دیتے ہوئے کہا تھا کہ الگ گروپ کو تسلیم کرنے کی کوئی بنیاد نہیں ہے ۔ اس کے علاوہ ممتا بنرجی کا ساتھ چھوڑنے والے ترنمول کانگریس کے 20 باغی اراکین پارلیمنٹ کو لوک سبھا میں الگ بیٹھنے کی منظوری مل گئی ہے ۔ گزشتہ 15 جون کو ترنمول کانگریس کے 20 اراکین پارلیمنٹ نے نیشنلسٹ سٹیزنز پارٹی آف انڈیا (این سی پی آئی) کے ساتھ انضمام کر لیا تھا۔

Source: Admin