گجرات کے احمد آباد میں ہفتہ کی شام ایک المناک حادثہ پیش آیا۔ یہ واقعہ محمود پورہ علاقے میں واقع پٹاخہ فیکٹری میں پیش آیا۔ ابتدائی معلومات کے مطابق ہفتہ کی دوپہر فیکٹری میں اچانک بھیانک آگ بھڑک اٹھی۔ آگ نے تیزی سے پوری فیکٹری کو اپنی لپیٹ میں لے لیا۔ اب تک آٹھ افراد کے ہلاک ہونے کی اطلاع ہے جبکہ کئی افراد شدید زخمی ہیں۔ تمام زخمیوں کو علاج کے لیے ایل جی اسپتال میں داخل کرایا گیا ہے۔ حادثے کی اطلاع ملتے ہی فائر بریگیڈ کی متعدد ٹیمیں جائے وقوعہ پر پہنچ گئیں۔ فائر فائٹرز آگ پر قابو پانے کی مسلسل کوشش کر رہے ہیں۔ پولیس اور مقامی انتظامیہ نے ریسکیو اور ریلیف آپریشن میں کسی قسم کی رکاوٹ کو روکنے کے لیے پورے علاقے کو گھیرے میں لے لیا ہے۔ بتایا جاتا ہے کہ آگ فیکٹری میں اتنی تیزی سے پھیلی کہ کئی مزدوروں کو بچ نکلنے کا موقع نہیں ملا۔ حکام نے خدشہ ظاہر کیا ہے کہ ملبے تلے مزید لوگ دبے ہو سکتے ہیں اور ہلاکتوں میں اضافہ ہو سکتا ہے۔ فی الحال آگ لگنے کی وجہ معلوم نہیں ہوسکی ہے۔ پولیس اور فائر ڈپارٹمنٹ نے آگ لگنے کی وجہ جاننے کے لیے تحقیقات کا آغاز کر دیا ہے۔ وہ یہ بھی تعین کرنے کی کوشش کر رہے ہیں کہ آیا فیکٹری میں حفاظتی معیارات پر عمل کیا جا رہا تھا۔ مقامی حکام کے مطابق حادثے کی اصل وجہ تحقیقات کے بعد ہی سامنے آئے گی۔ وزیر اعظم نریندر مودی نے حادثے پر گہرے دکھ کا اظہار کیا ہے۔ سوشل میڈیا پر جاری ایک پیغام میں انہوں نے کہا کہ احمد آباد پٹاخہ فیکٹری حادثے میں جانوں کے ضیاع کی خبر انتہائی افسوسناک ہے۔ انہوں نے سوگوار خاندانوں سے تعزیت کا اظہار کیا اور زخمیوں کی جلد صحت یابی کی تمنا کی۔ وزیراعظم نے یہ بھی کہا کہ مقامی انتظامیہ متاثرہ افراد کو ہر ممکن مدد فراہم کر رہی ہے۔ اس کے علاوہ وزیر اعظم کے قومی ریلیف فنڈ سے مہلوکین کے لواحقین کو دو ۔ و لاکھ روپے اور ہر زخمی کو 50 ہزار روپے کی مالی امداد کا اعلان کیا گیا ہے۔

Source: Admin