سعودی عرب کا بڑا اقدام، 1800 بیرونی عمرہ ایجنسیوں کے ساتھ معاہدے ختم

عمرہ انتظامات کے نظام کو بہتر بنانے کے لیے سعودی عرب نے ایک بڑا اور سخت فیصلہ کر لیا ہے، جس کے تحت غیر ملکی سطح پر کام کرنے والی سیکڑوں ٹریول ایجنسیوں کے ساتھ معاہدوں پر نظرِ ثانی شروع کر دی گئی ہے۔ سعودی وزارتِ حج و عمرہ نے تصدیق کی ہے کہ عمرہ کے شعبے میں کام کرنے والی 1800 غیر ملکی ٹریول ایجنسیوں کے ساتھ جاری معاہدے معطل کر دیے گئے ہیں۔ یہ تعداد مجموعی طور پر تقریباً 5800 ایجنسیوں میں سے ہے۔ وزارت کے مطابق یہ فیصلہ باقاعدہ دورانیہ جاتی جائزے کے نتائج اور ان ایجنسیوں کی کارکردگی میں پائی جانے والی کوتاہیوں اور خدمات کے معیار میں کمی کی بنیاد پر کیا گیا ہے۔ متعلقہ ایجنسیوں کو اپنی صورتحال درست کرنے کے لیے 10 دن کی مہلت دی گئی ہے۔ وزارت نے واضح کیا کہ معاہدوں کی معطلی کا اطلاق صرف نئے عمرہ ویزوں کے اجرا تک محدود ہے، جبکہ متاثرہ ایجنسیوں کو دی گئی 10 روزہ مہلت کے دوران نقائص دور کرنے اور مطلوبہ انتظامی تقاضے پورے کرنے پر معاہدے دوبارہ بحال کیے جا سکتے ہیں۔ وزارت نے اس امر کی بھی یقین دہانی کرائی کہ اس فیصلے کا اطلاق اُن معتمرین پر نہیں ہوگا، جن کے پاس پہلے سے جاری شدہ ویزے یا موجودہ بکنگز ہیں۔ ان معتمرین کو فراہم کی جانے والی تمام خدمات معمول کے مطابق جاری رہیں گی، تاکہ ان کے حقوق کا تحفظ اور مذہبی سفر کو مکمل سہولت کے ساتھ یقینی بنایا جا سکے۔ وزارتِ حج و عمرہ کے مطابق درجہ بندی کے نظام اور کارکردگی کے اشاریے (KPIs) حکمرانی کے فریم ورک کا ایک بنیادی حصہ ہیں، جن کا مقصد خدمات کے معیار کو بہتر بنانا، فراہم کنندگان کی ساکھ میں اضافہ کرنا اور اس بات کو یقینی بنانا ہے کہ تمام ادارے منظور شدہ معیار پر پورا اتریں، جہاں معتمر کی سہولت کو اولین ترجیح دی جاتی ہے۔ وزارت کے ترجمان ڈاکٹر غسان النویمی نے زور دے کر کہا کہ جو ایجنسیاں مقررہ مدت کے اندر اپنی کوتاہیاں دور کرنے میں ناکام رہیں گی، ان کے خلاف تمام قانونی کارروائیاں عمل میں لائی جائیں گی۔ انہوں نے مزید کہا کہ وزارت نگرانی، شفافیت اور ضابطوں کی پابندی کو مزید مضبوط بناتی رہے گی، تاکہ اللہ کے مہمانوں کو محفوظ اور مستحکم خدمات فراہم کی جا سکیں۔

Source: Social media