ٹرمپ کا جنوبی کوریا پر 25 فیصد ٹیرف بڑھانے کا اعلان

امریکی صدر ڈونلڈ ٹرمپ نے جنوبی کوریا کی مصنوعات پر ٹیرف 15 فیصد سے بڑھا کر 25 فیصد کرنے کا اعلان کیا ہے۔ ان کا کہنا ہے کہ جنوبی کوریا کی پارلیمنٹ نے امریکا کے ساتھ طے پانے والے تجارتی معاہدے پر بروقت عملدرآمد نہیں کیا۔ صدر ٹرمپ نے گزشتہ روز سوشل میڈیا پلیٹ فارم ٹروتھ سوشل پر جاری کیے گئے اپنے بیان میں کہا کہ ٹیرف کی نئی شرح گاڑیوں، لکڑی، ادویات اور دیگر مصنوعات پر لاگو ہوگی جو امریکی بنیادی لائن ’باہمی‘ ٹیرف کے تحت احاطہ کرتی ہے۔ دوسری جانب وائٹ ہاؤس کی جانب سے تاحال اس فیصلے کو قانونی شکل دینے کے لیے کوئی ایگزیکٹو آرڈر جاری نہیں کیا گیا ہے۔ جنوبی کوریا کے صدارتی دفتر چیونگ وا ڈے نے ٹرمپ کے اس بیان پر کہا ہے کہ اسے امریکا کی جانب سے ٹیرف میں اضافے کی کوئی باضابطہ اطلاع موصول نہیں ہوئی ہے۔ غیر ملکی میڈیا کے مطابق اس صورتحال کے پیش نظر کینیڈا میں موجود جنوبی کوریا کے وزیرِ تجارت کم جنگ کوان نے فوری طور پر امریکا جانے اور امریکی وزیر تجارت سے ملاقات کرنے کا ارادہ ظاہر کیا ہے۔ واضح رہے کہ جولائی میں امریکا اور جنوبی کوریا کے درمیان ایک فریم ورک تجارتی معاہدہ طے پایا تھا جس کے تحت امریکا نے جنوبی کوریا پر ٹیرف 25 فیصد سے کم کر کے 15 فیصد کرنے پر اتفاق کیا تھا۔ اس معاہدے کے تحت جنوبی کوریا نے امریکا میں 350 ارب ڈالر کی سرمایہ کاری کا وعدہ کیا تھا۔

Source: social media