پریاگ راج: لوک سبھا میں قائدِ حزبِ اختلاف اور کانگریس کے سینئر لیڈر راہل گاندھی کے 8 اگست کو پریاگ راج میں مجوزہ ’چھاتروں کی گونج‘ پروگرام کے لیے کے پی کالج گراؤنڈ کی بکنگ منسوخ کر دی گئی ہے۔ ہندی روزنامہ بھاسکر کی رپورٹ کے مطابق، کے پی (کایستھ پاٹھ شالہ) ٹرسٹ نے جاری کردہ ایک خط میں اس فیصلے کی وجہ طلبہ کی تعلیم پر ممکنہ اثرات، الہ آباد ہائی کورٹ کی ہدایات اور مسلسل بارش کے باعث میدان کی خراب حالت کو قرار دیا ہے۔

کے پی ٹرسٹ کے قائم مقام صدر چودھری جتیندر ناتھ سنگھ کی جانب سے جاری خط کے مطابق کالج کے پرنسپل نے ٹرسٹ کو آگاہ کیا کہ الہ آباد ہائی کورٹ کی ہدایات کے تحت تعلیمی اداروں میں پڑھائی اور دیگر تعلیمی سرگرمیوں میں کسی بھی قسم کی رکاوٹ نہیں آنی چاہیے۔ خط میں کہا گیا ہے کہ راہل گاندھی کے مجوزہ پروگرام کے انعقاد سے قریبی دو تعلیمی اداروں کے طلبہ کی روزمرہ تعلیمی سرگرمیاں متاثر ہو سکتی ہیں۔

ٹرسٹ نے اپنے فیصلے کی ایک اور وجہ مانسون کی بارشوں کو بھی بتایا ہے۔ خط کے مطابق کے پی کالج کا میدان بنیادی طور پر بیرونی کھیلوں کے لیے استعمال ہوتا ہے، مگر مسلسل بارش کے باعث اس کی حالت پہلے ہی خراب ہو چکی ہے، ایسے میں بڑے عوامی اجتماع سے میدان کو مزید نقصان پہنچنے کا اندیشہ ہے، جس کی مرمت میں کافی وقت اور وسائل درکار ہوں گے۔

اسی بنا پر ٹرسٹ نے پہلے جاری کی گئی اجازت واپس لیتے ہوئے کانگریس کو مشورہ دیا ہے کہ پروگرام بارش کا موسم ختم ہونے اور تعلیمی تعطیلات کے دوران منعقد کیا جائے تاکہ نہ طلبہ کی تعلیم متاثر ہو اور نہ ہی کھیل کے میدان کو نقصان پہنچے۔ ساتھ ہی کانگریس کی جانب سے جمع کرائی گئی بکنگ رقم بھی دفتر سے واپس لینے کی ہدایت دی گئی ہے۔

ادھر کانگریس نے اس پروگرام کے لیے بڑے پیمانے پر تیاریاں کر رکھی تھیں۔ پارٹی کی جانب سے اسے طلبہ اور نوجوانوں سے براہِ راست رابطے کی ایک اہم مہم قرار دیا جا رہا تھا۔ اطلاعات کے مطابق اس پروگرام میں شرکت کے لیے 1.75 لاکھ سے زائد طلبہ نے رجسٹریشن کرایا تھا، جبکہ وسیع انتظامات بھی مکمل کیے جا چکے تھے۔

8 اگست کو منعقد ہونے والے اس پروگرام میں راہل گاندھی طلبہ سے تعلیم، روزگار، مسابقتی امتحانات اور نوجوانوں کو درپیش دیگر مسائل پر گفتگو کرنے والے تھے۔ تاہم مقام کی بکنگ منسوخ ہونے کے بعد پروگرام کے انعقاد کو لے کر غیر یقینی صورتحال پیدا ہو گئی ہے۔

Source: Admin