نئی دہلی / لیہہ:لداخ کی ماحولیاتی تحفظ اور آئینی حقوق کی تحریک کے سرکردہ رہنما اور معروف فعال پسند سونم وانگ چک نے مرکزی حکومت پر شدید تنقید کرتے ہوئے الزام عائد کیا ہے کہ ان کی26روزہ طویل بھوک ہڑتال ختم کرنے کے موقع پر لی گئی تصاویر کو منظر عام پر نہ لانے کا وعدہ توڑ دیا گیا۔ ان کا کہنا ہے کہ اس پورے واقعے نے انہیں ملک کی تمام سیاسی جماعتوں اور ان کی قیادت سے شدید مایوس کر دیا ہے۔
معروف صحافی راجدیپ سر دیسائی کو دیے گئے ایک خصوصی انٹرویو میں 59 سالہ وانگ چک نے سنسنی خیز انکشاف کرتے ہوئے بتایا کہ آدھی رات کو مرکزی وزراء جے پی نڈا اور جتیندر سنگھ کے ساتھ ان کی ملاقات طے ہوئی تھی۔ اس میٹنگ کے دوران واضح طور پر یہ بات طے پائی تھی کہ جب تک اپوزیشن رہنماو¿ں اور طلبہ نمائندوں کو بھی اس پیش رفت میں شامل نہیں کر لیا جاتا، تب تک اس ملاقات اور بھوک ہڑتال ختم کرنے کی کوئی بھی تصویر میڈیا میں جاری نہیں کی جائے گی۔
وانگ چک نے افسوس کا اظہار کرتے ہوئے کہا کہ"مرکزی وزراء اپنے ساتھ ذاتی فوٹو گرافرز لائے تھے۔ انہوں نے مجھ سے پکا وعدہ کیا تھا کہ وہ تصاویر وائرل نہیں کریں گے، لیکن انہوں نے اپنا وعدہ توڑ دیا۔"
سونم وانگ چک نے وضاحت کی کہ لداخ کی روایت کے مطابق مطالبات تسلیم کیے جانے کے بعد حکومت کا نمائندہ مظاہرین کو جوس یا سوپ پلا کر بھوک ہڑتال ختم کرواتا ہے۔ تاہم، وہ چاہتے تھے کہ اس تاریخی لمحے کو صرف ایک حکمران جماعت کا ایونٹ بنا کر پیش نہ کیا جائے۔
انہوں نے مزید کہا کہ "میں نے وزراء سے صاف کہا تھا کہ میں چاہتا ہوں دیگر تمام سیاسی جماعتوں کے رہنما، ان کی قیادت اور طلبہ لیڈرز بھی اس کا حصہ بنیں۔ میں اسے ایک مشترکہ اور یکجہتی کا مظاہرہ بنانا چاہتا تھا۔"
چونکہ وزراء آدھی رات کے بعد پہنچے تھے، اس لیے وانگ چک نے ایک متبادل تجویز دی تھی کہ وہ بھوک ہڑتال ختم کر دیں گے، لیکن اس کی خبر اور تصاویر ان کی اپنی شرائط پر جاری کی جائیں گی—جس میں اپوزیشن اور طلبہ رہنماو¿ں کی تصاویر بھی شامل ہوں تاکہ یہ پورے ملک کی مشترکہ کوشش دکھائی دے۔ مگر حکومت نے ان کی شرائط اور وعدے کو بالائے طاق رکھ کر تصاویر جاری کر دیں۔

Source: Admin