Kolkata

ایف آئی آر اور تلخی کے بعد اچانک دوستانہ موڑ! ہمایوں کبیر نے وزیراعلیٰ کے ساتھ تصویر پوسٹ کر کے سب کو چونکا دیا

05/08/26

کولکاتا: بنگال کی سیاست میں ایک اور غیر متوقع اور دلچسپ موڑ سامنے آیا ہے۔ حال ہی میں قانون ساز اسمبلی میں وزیراعلیٰ شوبھندو ادھیکاری کی جانب سے سخت انتباہ کا سامنا کرنے والے نوادہ کے ایم ایل اے ہمایوں کبیر نے بدھ کے روز سیکریٹریٹ میں وزیراعلیٰ سے ملاقات کی۔ ملاقات کے فوراً بعد انہوں نے خود وزیراعلیٰ کے ساتھ اپنی تصاویر سوشل میڈیا پر پوسٹ کر کے سیاسی حلقوں میں نئی بحث چھیڑ دی ہے۔
یاد رہے کہ گزشتہ دنوں اسمبلی کے اندر وزیراعلیٰ شوبھندو ادھیکاری نے ہمایوں کبیر کو سخت لہجے میں خبردار کرتے ہوئے کہا تھا کہ"آخری بار خبردار کر رہا ہوں، سدھر جائیں! سبق سکھانے کا وقت اب آ گیا ہے۔"
اس سخت تلخی کے بعد اس غیر متوقع ملاقات پر صفائی دیتے ہوئے ہمایوں کبیر نے سوشل میڈیا پر لکھا کہ یہ ایک خالصتاً "پروٹوکول اور شائستگی" پر مبنی ملاقات تھی۔ انہوں نے بتایا کہ اس میٹنگ میں ضلع مرشد آباد کی مجموعی ترقی اور عوام کے طویل عرصے سے زیرِ التوا مسائل پر تفصیلی بات چیت ہوئی۔
ہمایوں کبیر کے مطابق، انہوں نے مرشد آباد کے لیے دو اہم ترین پروجیکٹس کی منظوری کے لیے وزیراعلیٰ سے خصوصی درخواست کی ہے۔ہمایوں کبیر نے دعویٰ کیا کہ وزیراعلیٰ نے ان کی تمام تجاویز کو نہایت ہمدردی اور سنجیدگی سے سنا اور ضلع کی ترقی کے لیے مثبت رویہ دکھایا۔

Source: Admin