اقتدار نہیں تو بھائی دوج بھی نہیں‘، ممتا کو بھائی دوج کے معاملے پر دلیپ کا طنز
بھائی دوج کی صبح ریاست کے پنچایت وزیر دلیپ گھوش (Dilip Ghosh) خوشگوار موڈ میں نظر آئے۔ آج، بدھ کی صبح وہ راج رہٹ کے ایکو پارک میں صبح کی سیر کے لیے گئے تھے۔ وہیں بھائی دوج کی تقریب کا اہتمام کیا گیا تھا۔ دلیپ گھوش نے بھی بھائی دوج کا ٹیکہ لگوایا۔ انہوں نے ریاست میں صنعت اور روزگار کے حوالے سے اہم بیان دیا۔ ساتھ ہی ممتا بنرجی کو بھائی دوج کے معاملے پر طنز کا نشانہ بھی بنایا۔
اب ممتا بنرجی وزیر اعلیٰ نہیں رہیں۔ پارٹی کے رہنما بھی ان سے دور ہو گئے ہیں۔ پارٹی بھی ٹوٹ چکی ہے۔ کالی گھاٹ میں ممتا بنرجی کے گھر پر گزشتہ سال تک بڑے پیمانے پر بھائی دوج کی تقریب منعقد کی جاتی تھی۔ ترنمول کے صفِ اول کے رہنما ممتا سے ٹیکہ لگواتے تھے۔ کیا اس بار بھی بھائی دوج کی تقریب منعقد ہوگی؟ اس حوالے سے بحث جاری ہے۔ اسی معاملے پر دلیپ گھوش نے طنز کیا۔ انہوں نے کہا، ”دراصل سب لوگ اقتدار یا طاقت کا ٹیکہ لگوانے جاتے تھے۔ آج اقتدار نہیں ہے، اس لیے ٹیکہ بھی نہیں ہے۔ بہت سے بھائی تھے، جو مبینہ طور پر 30 سے 40 سال سے ان سے ٹیکہ لگواتے آ رہے تھے۔ دیکھتے ہیں کہ آج وہ بھائی وہاں جاتے ہیں یا نہیں۔“
دلیپ نے مزید کہا، ”جو لوگ ان کے پاس ٹیکہ لگوانے آتے تھے، وہ ممتا بنرجی کے پاس نہیں آتے تھے بلکہ وزیر اعلیٰ کے پاس آتے تھے۔ اب وہ وزیر اعلیٰ نہیں ہیں، اس لیے ٹیکہ بھی نہیں ہے۔“
بوبی حکیم، اروپ بسواس سمیت کئی رہنما بھائی دوج کے موقع پر کالی گھاٹ میں ممتا بنرجی کے گھر جایا کرتے تھے۔ اس کے علاوہ وہ مختلف پروگراموں میں بھی شرکت کرتے تھے۔ اس حوالے سے دلیپ گھوش نے طنز کرتے ہوئے کہا، ”یہ سب اقتدار کا ٹیکہ تھا۔ نہ دیدی ہیں اور نہ ہی بھائی موجود ہیں۔ جو لوگ صرف اقتدار کا فائدہ اٹھاتے ہیں، ان کے ساتھ ایسا ہی ہوتا ہے۔ سماجی رشتوں کا کوئی بندھن نہیں تھا۔ ہر چیز میں سیاست شامل کر دی گئی تھی۔ پھر ایسا ہی ہونا تھا۔“
اس بار بیرونِ ملک مقیم ہندوستانیوں کی کانفرنس مغربی بنگال میں منعقد ہوگی۔ وزیر اعلیٰ شوبھیندو ادھیکاری آج بیرونِ ملک مقیم ہندوستانیوں کے میلے میں شرکت کے لیے جا رہے ہیں۔ اس حوالے سے دلیپ گھوش نے کہا، ”شمالی بنگال میں صنعتی کانفرنس منعقد کرنے پر بات چیت چل رہی ہے۔ بیرونِ ملک مقیم ہندوستانی یہاں آئیں گے۔ یہاں صنعتیں قائم ہوں گی۔ مرکز اور ریاست دونوں یہی چاہتے ہیں۔ بیرونِ ملک مقیم ہندوستانی اب تک مغربی بنگال کو لے کر فکرمند تھے، لیکن اب وہ بھی یہاں آنا چاہتے ہیں۔ اس طرح کے پروگرام بنگال کی ترقی کے لیے مو¿ثر ثابت ہوں گے۔“
اقتدار نہیں تو بھائی دوج بھی نہیں‘، ممتا کو بھائی دوج کے معاملے پر دلیپ کا طنز...
Source: Admin
