چھٹ پوجا کے موقع پر دوبارہ آلودگی کے خدشے سے ماہرینِ ماحولیات فکرمند
کالی پوجا کے بعد اب چھٹ پوجا کے موقع پر صوتی اور فضائی آلودگی کو لے کر ماہرینِ ماحولیات کی تشویش بڑھ گئی ہے۔ کولکاتا کی ہوا کے معیار کو لے کر بھی فکرمندی میں اضافہ ہو رہا ہے۔ تاہم شور و غل پر قابو پانے کے لیے پولیس اور انتظامیہ تیار ہے۔ چھٹ پوجا کے دن بھی آلودگی کنٹرول بورڈ کی خصوصی ٹیم سڑکوں پر موجود رہے گی۔
کالی پوجا کی رات شہر کی فضا زہریلی ہو گئی تھی۔ آلودگی کی سطح 500 کے قریب پہنچ گئی تھی۔ آتش بازی کے شور پر قابو پانے کے لیے آدھی رات کو پولیس کے ساتھ شہری ترقیات کی وزیر اگنمترا پال سڑکوں پر اتری تھیں۔ پولیس اور آلودگی کنٹرول بورڈ کے اہلکار بھی شہر کے ایک سرے سے دوسرے سرے تک دوڑتے رہے۔ اس کے باوجود صوتی آلودگی پر مکمل طور پر قابو نہیں پایا جا سکا۔ کئی مقامات پر تیز آواز والے پٹاخوں کا استعمال دیکھا گیا۔ ڈی جے بند کرانے میں کامیابی ملی، لیکن کئی مقامات پر دیر رات تک انتہائی تیز آواز میں مائیک بجانے کی شکایات سامنے آئیں۔
چھٹ پوجا کے موقع پر بھی صبح 6 بجے سے 8 بجے تک، یعنی صرف دو گھنٹے پٹاخے جلانے کی اجازت ہے۔ اس میں صرف سبز پٹاخوں کو ہی چھوٹ دی گئی ہے۔ ماہرِ ماحولیات سومندر موہن گھوش کا کہنا ہے کہ کالی پوجا کے دوران جو صورتحال دیکھنے میں آئی، اس کے بعد چھٹ پوجا کو لے کر خدشات مزید بڑھ گئے ہیں۔
دوسری جانب کالی پوجا کے بعد بارش ہونے سے شہر کے لوگوں نے کچھ راحت محسوس کی ہے۔ ماہرِ ماحولیات ڈاکٹر سواتی نندی چکرورتی نے کہا، ”کالی پوجا کے دوران ہوا زہریلی ہو گئی تھی۔ تاہم منگل سے بارش شروع ہونے کے باعث آلودگی کی سطح میں کچھ کمی آئی ہے۔ لیکن چھٹ پوجا قریب ہے۔ اگر لوگوں میں بیداری نہیں آئی تو آلودگی ایک بار پھر بے قابو ہو سکتی ہے۔
چھٹ پوجا کے موقع پر دوبارہ آلودگی کے خدشے سے ماہرینِ ماحولیات فکرمند...
Source: Admin
