بالی ووڈ کے بھائی جان سلمان خان کی فلم سکندر نے دنیا بھر کے باکس آفس پر صرف 5 دن میں 169 کروڑ کمالیے۔ سلمان خان کی عیدالفطر پر ریلیز ہونے والی فلم سکندر ناقدین کے منفی تبصروں کے باوجود کمائی میں تامل ہٹ فلم ڈریگن سے آگے نکل گئی ہے۔ بھائی جان کی فلم اس کے ساتھ ہی رواں برس ریلیز ہونے والی بھارتی فلموں میں کمائی کے لحاظ سے 5ویں پوزیشن حاصل کرنے میں کامیاب رہی ہے، امید کی جارہی ہے آئندہ ہفتے تک وہ چوتھے نمبر پر آجائے گی۔ سلمان خان کی فلم سکندر کو ناقدین کی طرف سے نہ تو بہترین الفاظ ملے اور نہ ہی پیار بھرا اظہار ملا، اس کے باوجود بھی فلم باکس آفس پر تیزی سے آگے بڑھ رہی ہے۔ سکندر فلم کے پروڈکشن ہاؤس کے جاری کردہ اعداد و شمار کے مطابق سلمان خان کی فلم نے پانچویں دن بھارت میں 8 اعشاریہ 28 کروڑ اور ملک سے باہر 3 کروڑ کا بزنس کیا ہے، اس کی موجودہ رفتار کو دیکھتے ہوئےتوقع کی جاسکتی ہے کہ فلم پیر تک دنیا بھر میں 200 کروڑ کا ہندسہ عبور کرلے گی۔ میڈیا رپورٹس کے مطابق سلمان خان کی ایکشن ڈرامہ فلم سنیما سے ہٹنے تک 300 کروڑ کمانے کی کوشش کرے گی، موجودہ صورتحال بھائی جان جیسے اسٹار اداکار کےلیے بڑا دھچکا ہے۔ سکندر سے 3 دن پہلے ریلیز ہونے والی ملیالم فلم ایل 2 نے دنیا بھر میں 250 کروڑ کا بزنس کرلیا ہے۔ رواں سال کے دوران چھاوا، ایل 2، سان کرانتی کی اور گیم چینجرز باکس آفس پر زیادہ کمائی کرنے والی فلمیں ہیں، اس فہرست میں سکندر کا پانچواں نمبر ہے، جو آئندہ ہفتے تک بزنس میں گیم چینجرزکو پیچھے چھوڑ دے گی۔

Source: social Media