"میں جنت میں جانے کا اہل نہیں ہوں"... ٹرمپ کی 'پریئر بریک فاسٹ' کے موقع پر بذلہ سنجی

امریکی صدر ڈونلڈ ٹرمپ نے "ریئر بریک فاسٹ" کے موقع پر حاضرین کے ساتھ خوش طبعی کرتے ہوئے کہا کہ شاید وہ "جنت" تک نہ پہنچ پائیں۔ انہوں نے اپنے مخصوص انداز میں دہرایا کہ "میرے خیال میں، میں اس کا اہل نہیں ہوں اور نہ میں اس کے لیے کچھ کر سکتا ہوں، لیکن میں مذہب کے لیے جو اچھے کام کر رہا ہوں اس کی وجہ سے مذہب اب پہلے سے کہیں زیادہ مقبول اور نمایاں ہو چکا ہے۔" تقریباً 77 منٹ پر مشتمل اپنے خطاب کے دوران ڈونلڈ ٹرمپ اپنا مخصوص غیر مربوط اندازِ گفتگو کرتے نظر آئے، انھوں نے اصل موضوع سے ہٹ کر مختلف معاملات پر بات کی۔ انہوں نے ایوانِ نمائندگان کے اسپیکر مائیک جانسن کی تعریف کرتے ہوئے انہیں ایک "باصلاحیت شخص" قرار دیا جو ایک مختصر اکثریت کے ساتھ ایوان چلا رہے ہیں۔ ڈونلڈ ٹرمپ نے مذاقاً بتایا کہ جانسن بسا اوقات صبح تین بجے انہیں فون کر کے ریپبلکن پارٹی کے ان نو ارکان سے بات کرنے کی درخواست کرتے ہیں جنہیں "توجہ اور شفقت" کی ضرورت ہوتی ہے۔ صدر نے وزیر برائے داخلہ سکیورٹی، کرسٹی نوم کا دفاع کرتے ہوئے واضح کیا کہ ان کا عہدہ محفوظ ہے، حالانکہ ان کی وزارت کو مینی سوٹا میں مظاہرین پر فائرنگ جیسے واقعات پر شدید تنقید کا سامنا ہے۔ اسی طرح انہوں نے انٹیلی جنس ڈائریکٹر ٹیلسی گارڈ کا بھی دفاع کیا جنہیں جورجیا میں الیکشن سینٹر پر ایف بی آئی کے چھاپے کے وقت موجودگی پر جانچ پڑتال کا سامنا ہے۔ خارجہ پالیسی پر بات کرتے ہوئے ڈونلڈ ٹرمپ نے کہا کہ ایران کے ساتھ "مذاکرات جاری ہیں" جبکہ وینزویلا کی قیادت کے ساتھ ہمارے "بہترین تعلقات" ہیں۔ انہوں نے ایل سلواڈور کے صدر نجیب بوکیلے کے متنازعہ قید خانے کے انتظام کو بھی "انسانی ہمدردی کا کام" قرار دیا۔ خطاب کے آخر میں وہ دوبارہ مذہبی موضوع کی طرف لوٹے اور دعویٰ کیا کہ انہوں نے مذہب کے لیے جتنا کام کیا ہے اتنا کسی دوسرے صدر نے نہیں کیا۔ انہوں نے جدید دور کے ایگزیکٹو افراد کے "جانب دار" رویے کو تنقید کا نشانہ بنایا اور ڈیموکریٹس پر وار کرتے ہوئے کہا کہ "میں نہیں سمجھتا کہ کوئی بھی با ایمان شخص ڈیموکریٹ کو ووٹ کیسے دے سکتا ہے"۔

Source: social media