میں آئندہ سال غزہ میں امن کونسل کا اعلان کروں گا: ٹرمپ

امریکی صدر ڈونلڈ ٹرمپ نے اعلان کیا ہے کہ غزہ کی پٹی کے لیے خصوصی 'امن کونسل' میں شامل ہونے والے عالمی رہنماؤں کے نام آئندہ سال کے آغاز میں جاری کیے جائیں گے۔ وائٹ ہاؤس کے روزویلٹ روم میں ایک تقریب کے دوران صحافیوں سے گفتگو کرتے ہوئے ٹرمپ نے کہا کہ کئی عالمی رہنماؤں نے اس کونسل میں شمولیت کی خواہش ظاہر کی ہے۔ یہ کونسل غزہ کی پٹی کے لیے تیار کی گئی اس منصوبہ بندی کا حصہ ہے، جس کے تحت اسرائیل اور حماس تنظیم کے درمیان ایک نازک جنگ بندی قائم ہوئی تھی۔ چند روز قبل ایک مغربی سفارت کار اور ایک عرب اہل کار نے انکشاف کیا تھا کہ سال کے اختتام تک ایک بین الاقوامی ادارے کا اعلان کیا جائے گا جو اس علاقے کی نگرانی کا ذمّہ سنبھالے گا۔ دونوں اہل کاروں نے شناخت ظاہر نہ کرنے کی شرط پر بتایا کہ یہ ادارہ “امن کونسل” کہلائے گا، جس کی سربراہی امریکی صدر ڈونلڈ ٹرمپ کریں گے۔ ان کے مطابق اس میں مشرقِ وسطیٰ اور مغربی دنیا کے تقریباً بارہ دیگر رہنما شامل ہوں گے، جو اقوام متحدہ کے تفویض کردہ اختیار کے تحت دو سال کے لیے (مزید توسیع کے امکان کے ساتھ) غزہ کی پٹی کا انتظام سنبھالیں گے۔ یہ معلومات ایسوسی ایٹڈ پریس نیوز ایجنسی نے جاری کیں۔ اہل کاروں نے یہ بھی بتایا کہ جنگ کے بعد غزہ کی پٹی کے روزمرہ انتظامات چلانے کے لیے فلسطینی ماہرین پر مشتمل ایک تکنیکی کمیٹی کا اعلان بھی کیا جائے گا۔ مزید کہا گیا کہ یہ منصوبہ سال 2025 کے اختتام پر ٹرمپ اور اسرائیلی وزیراعظم بنیامین نیتن یاہو کی ملاقات کے موقع پر با ضابطہ طور پر سامنے لایا جائے گا۔

Source: social media