متحدہ عرب امارات کا اپنی فضائی حدود میں ڈرون طیاروں کی پرواز پر مکمل پابندی کا اعلان

متحدہ عرب امارات کی جنرل سول ایوی ایشن اتھارٹی نے آج منگل کے روز ریاست کو درپیش غیر معمولی حالات کے پیش نظر ہر قسم کے ڈرون طیاروں اور ہلکے کھیلوں کے طیاروں کے آپریشن پر مکمل پابندی عائد کرنے کا اعلان کیا ہے۔ اتھارٹی نے اپنے ایک بیان میں کہا ہے کہ ملک جن غیر معمولی حالات سے گزر رہا ہے ان کے پیش نظر ہم تمام اقسام کے ڈرون طیاروں اور ہلکے کھیلوں کے طیاروں کے استعمال پر مکمل پابندی کی تصدیق کرتے ہیں۔ اتھارٹی نے مزید اشارہ کیا ہے کہ قانونی کارروائی سے بچنے کے لیے اس فیصلے کی پاسداری لازمی اور حتمی ہے۔ یہ پابندی ایک ایسے وقت میں لگائی گئی ہے جب ایران کی جانب سے متعدد خلیجی ممالک کے خلاف میزائل اور ڈرون حملوں کے سلسلے کے بعد علاقائی کشیدگی عروج پر ہے جس میں کچھ اہم انفراسٹرکچر اور تیل کی تنصیبات کو نشانہ بنایا گیا ہے۔ ان حملوں نے فضائی سلامتی اور سویلین پروازوں کے تحفظ کے حوالے سے شدید خدشات پیدا کر دیے ہیں۔ گذشتہ مہینوں کے دوران خلیجی ہوائی اڈوں پر احتیاطی تدابیر میں اضافہ دیکھا گیا ہے جس میں بعض فضائی راستوں پر عارضی پابندیاں عائد کرنا اور فضائی حدود میں الرٹ کی سطح کو بلند کرنا شامل ہے۔ متحدہ عرب امارات کا یہ نیا فیصلہ فضائی نیویگیشن کی حفاظت کو یقینی بنانے اور غیر مستحکم سکیورٹی حالات میں ڈرونز یا ہلکے کھیلوں کے طیاروں کے استعمال سے پیدا ہونے والے کسی بھی ممکنہ خطرے کو روکنے کے لیے اٹھائے گئے اقدامات کا حصہ ہے۔

Source: social media