ممدانی کی جانب سے گرفتاری کا خطرہ مگر نیتن یاہو کا دورۂ نیویارک کا ارادہ برقرار

اسرائیلی وزیرِ اعظم بنجمن نیتن یاہو نے کہا ہے کہ وہ بدستور نیویارک جانے کا ارادہ رکھتے ہیں حالانکہ وہاں کے نومنتخب میئر زہران ممدانی کی جانب سے بین الاقوامی فوجداری عدالت (آئی سی سی) کے وارنٹ کی تعمیل میں ان کی گرفتاری کا خدشہ ہے۔ "جی ہاں، میں نیویارک آؤں گا،" نیتن یاہو نے نیویارک ٹائمز کے ڈیل بک فورم کے ساتھ ایک ورچوئل انٹرویو میں کہا۔ کیا وہ ممدانی سے بات کرنا چاہیں گے، اس سوال کے جواب میں نیتن یاہو نے کہا، "اگر وہ اپنا ارادہ بدل دیں اور کہیں کہ ہمیں (اسرائیل کو) بقا کا حق ہے تو یہ گفتگو کے لیے ایک اچھا آغاز ہو گا۔" نیویارک کے اولین مسلم اور اولین جنوبی ایشیائی میئر اور ایک جمہوری سوشلسٹ ممدانی بارہا کہہ چکے ہیں کہ وہ اسرائیل کے حقِ بقا کی حمایت کرتے ہیں۔ لیکن انہوں نے یہ کہنے سے گریز کیا کہ اسرائیل کو یہودی ریاست ہونے کا حق ہے۔ ان کے خیال میں کسی بھی ملک کو مذہب یا دیگر عوامل کی بنیاد پر "شہری حقوق میں عدم مساوات" روا نہیں رکھنی چاہیے۔ ممدانی نے عزم ظاہر کیا ہے کہ نیتن یاہو یا روسی صدر ولادیمیر پوتن سمیت بین الاقوامی فوجداری عدالت کو مطلوب رہنماؤں کے خلاف وارنٹ گرفتاری نافذ کرنے کے لیے وہ نیویارک پولیس ڈیپارٹمنٹ کو بھیجیں گے۔ ممدانی کے بیانات کے باوجود نیتن یاہو کی گرفتاری واقع ہونے کا امکان نہیں ہے اور یہ امر بحث طلب ہے کہ کیا نومنتخب میئر کے پاس اس کا اختیار ہے۔ وفاقی حکومت امیگریشن کے معاملات سنبھالتی ہے اور صدر ڈونلڈ ٹرمپ کی انتظامیہ نے بھرپور طریقے سے اسرائیل کا دفاع کیا ہے جن میں آئی سی سی کے ججز اور پراسیکیوٹرز کے خلاف پابندیاں عائد کرنا شامل ہے۔ اسرائیل سے باہر یہودیوں کی سب سے بڑی آبادی کا مسکن ہونے کے ساتھ ساتھ نیویارک میں اقوامِ متحدہ کا صدر دفتر بھی ہے جہاں نیتن یاہو سالانہ جنرل اسمبلی میں باقاعدگی سے شرکت کرتے رہے ہیں۔ میزبان ملک کے طور پر ایک معاہدے کے تحت امریکہ کا اقوامِ متحدہ کی باضابطہ کارروائیوں کے لیے ویزا جاری کرنا ضروری ہوتا ہے اگرچہ ستمبر میں ٹرمپ انتظامیہ نے فلسطینی رہنما محمود عباس کو داخلے کی اجازت دینے سے انکار کر دیا تھا۔

Source: social media