ممبئی· ٹرین بم دھماکہ معاملہ باعزت بری کئے گئے ملزم نے نو کروڑ معاوضے کا مطالبہ کیا

ممبئی، 12 ستمبر: عبدالواحد شیخ، جو 7/11 ممبئی لوکل ٹرین دھماکوں کے مقدمے میں 2015 میں بری ہونے والے واحد شخص تھے ، نے اپنی نو سالہ قید کو غلط قرار دیتے ہوئے 9 کروڑ روپے معاوضے کا مطالبہ کیا ہے ۔ انہوں نے یہ اپیل قومی انسانی حقوق کمیشن اور مہاراشٹر اسٹیٹ ہیومن رائٹس کمیشن کو بھیجی ہے ۔ شیخ نے یہ قدم اس وقت اٹھایا جب جولائی میں بامبے ہائی کورٹ نے مقدمے کے تمام 12 ملزمان کو بری کر دیا اور اپنے فیصلے میں کہا کہ استغاثہ مکمل طور پر کیس ثابت کرنے میں ناکام رہا۔ شیخ، جو پیشے سے اسکول ٹیچر ہیں، کو 2006 میں ممبئی کی مضافاتی ٹرینوں پر ہونے والے سلسلہ وار دھماکوں کے بعد گرفتار کیا گیا تھا۔ ان بم دھماکوں میں سات مقامات پر بیک وقت دھماکے ہوئے ، جن میں 180 سے زائد افراد جاں بحق اور سیکڑوں زخمی ہو گئے تھے ۔ شیخ نے نو سال جیل میں گزارنے کے بعد رہائی پائی۔ اپنی درخواست میں انہوں نے جسمانی اور ذہنی اذیتوں، صحت پر پڑنے والے سنگین اثرات اور ان کے خاندان کو ہونے والے مالی نقصانات کی تفصیل بیان کرتے ہوئے معاوضے کی مانگ کی ہے ۔

Source: uni news