بھوپال:
مدھیہ پردیش کی راجدھانی بھوپال میں حضور اسمبلی حلقہ سے بھارتیہ جنتا پارٹی (بی جے پی) کے رکنِ اسمبلی (ایم ایل اے) رمیشور شرما کا ایک متنازعہ بیان سامنے آنے کے بعد شدید سیاسی اور عوامی غصے کی لہر دوڑ گئی ہے۔ بھوپال کے کروند علاقے میں واقع بھگت سنگھ چوراہے پر اتوار کی رات منعقدہ 'مٹکی پھوڑ' (مٹکیاں توڑنے کا روایتی مقابلہ) کے پروگرام کے دوران ایک عوامی اجتماع سے خطاب کرتے ہوئے رمیشور شرما نے کہا، "اگر آپ کروند چوراہے سے میزائل داغیں، تو وہ قاضی کیمپ میں جا کر گرنا چاہیے"۔

واضح رہے کہ قاضی کیمپ بھوپال کے پرانے شہر کے نیو کباڑ خانہ کے قریب واقع ایک معروف مسلم اکثریتی علاقہ ہے۔ اس بیان کے فوراً بعد جب معاملہ گرم ہوا تو ایم ایل اے شرما نے اپنی صفائی پیش کرتے ہوئے دعویٰ کیا کہ وہ بھوپال کے قاضی کیمپ کا نہیں بلکہ پاکستان کے دارالحکومت اسلام آباد میں واقع "قاضی کیمپ" کا حوالہ دے رہے تھے۔

متقابلہ مٹکی پھوڑ کے اس تقریب میں ایم ایل اے رمیشور شرما نے ہندو اتحاد، قوم پرستی اور دہشت گردی جیسے موضوعات پر بات کی۔ انہوں نے کہا کہ ہندوؤں کو صرف مٹکی پھوڑ مقابلوں تک محدود نہیں رہنا چاہیے بلکہ معاشرے کو ہر سطح پر متحد ہونا ہوگا۔ ہندو برادری سے ذات پات کی تفریق ختم کرنے کی اپیل کرتے ہوئے انہوں نے کہا کہ ہر شخص کو اپنی ذات سے پہلے ہندو اور بھارتی کے طور پر شناخت قائم کرنی چاہیے۔ پاکستان کا ذکر کرتے ہوئے شرما نے کہا کہ ایک دن لاہور، ڈھاکہ اور اسلام آباد میں بھی مٹکی پھوڑ کے مقابلے منعقد ہوں گے۔ انہوں نے وہاں موجود ہجوم سے پوچھا کہ کیا وہ اسلام آباد میں مٹکی توڑنا چاہتے ہیں اور پھر کہا کہ اس کے لیے پہلے وہاں کی "مٹکی" (نظام) کو توڑنا ہوگا۔
اس متنازعہ بیان اور بعد میں دی گئی صفائی کے بعد کانگریس رہنماؤں اور سماجی کارکنوں نے بی جے پی ایم ایل اے کو آڑے ہاتھوں لیا ہے۔


کانگریس کے ریاستی ترجمان راہل راج نے اسے بی جے پی اور آر ایس ایس کا دہرا کردار قرار دیا۔ انہوں نے کہا، "ایک طرف آر ایس ایس کے سربراہ موہن بھاگوت کہتے ہیں کہ جو ہندو مسلمانوں سے نفرت کرتا ہے وہ ہندو ہو ہی نہیں سکتا، اور دوسری طرف ان کا ایم ایل اے کھلے عام ایک مسلم اکثریتی علاقے پر میزائل داغنے کی بات کرتا ہے"۔

کانگریس کے میڈیا کوآرڈینیٹر عباس حافظ نے شرما کے اسلام آباد والے دعوے کو جھوٹا قرار دیتے ہوئے کہا کہ انٹرنیٹ یا کسی بھی دستاویز پر پاکستان یا اسلام آباد میں "قاضی کیمپ" نام کی کسی جگہ کا کوئی وجود ہی نہیں ملتا۔ عباس حافظ نے سوال اٹھایا کہ رمیشور شرما کس قاضی کیمپ کا ذکر کر رہے تھے اور انہوں نے مدھیہ پردیش کے وزیر اعلیٰ موہن یادو سے اس معاملے پر حکومت کا موقف واضح کرنے اور ایم ایل اے کے خلاف کارروائی کا مطالبہ کیا۔
آل انڈیا کانگریس کمیٹی اقلیتی شعبے کے رہنما ڈاکٹر امین العالم خان سوری نے شدید تنقید کرتے ہوئے کہا کہ عوامی چوراہے سے شہری آبادی پر میزائل داغنے کی بات کرنا کوئی بہادری نہیں بلکہ ایک غیر ذمہ دارانہ اور فرقہ وارانہ ذہنیت کا ثبوت ہے۔
کانگریس رہنما اسد الدین کروائی اور صحافی کلپش راول نے اس تقریر کو فرقہ وارانہ ہم آہنگی بگاڑنے کی سازش قرار دیتے ہوئے مطالبہ کیا کہ بی جے پی ایم ایل اے کے خلاف فوری طور پر ایف آئی آر درج کی جائے۔