’کمبوڈیا کیساتھ جھڑپیں جاری ہیں‘: تھائی وزیر اعظم نے ٹرمپ کا جھوٹ بے نقاب کر دیا

بینکاک : تھائی لینڈ نے کمبوڈیا کے ساتھ جنگ بندی معاہدے کا امریکی صدر ڈونلڈ ٹرمپ کا دعویٰ جھوٹا قرار دے دیا۔ تھائی لینڈ کے وزیر اعظم انوتین چرنویراکول نے ٹرمپ کا دعویٰ مسترد کرتے ہوئے واضح کیا کہ کمبوڈیا کے ساتھ جنگ بندی کا کوئی معاہدہ نہیں ہوا، امریکی صدر کے ساتھ ٹیلی فون پر صرف تازہ ترین صورتحال پر گفتگو ہوئی تھی۔ انہوں نے کہا کہ ٹرمپ سے جنگ بندی پر کوئی بات نہیں ہوئی، کمبوڈیا کے ساتھ جھڑپیں جاری ہیں، ہم اپنی خودمختاری اور عوام کے تحفظ کیلیے ہر ممکن اقدامات کریں گے۔ واضح رہے کہ گزشتہ روز امریکی صدر ڈونلڈ ٹرمپ نے اپنے ایک بیان میں دعویٰ کیا تھا کہ تھائی لینڈ اور کمبوڈیا کے وزرائے اعظم سے اہم گفتگو ہوئی اور دونوں ممالک نے آج سے جنگ بندی پر اتفاق کر لیا ہے۔ ٹرمپ کا کہنا تھا کہ سڑک کنارے بم دھماکا حادثاتی تھا جس میں کئی تھائی فوجی ہلاک ہوئے، تھائی لینڈ نے دھماکے کے بعد سخت جواب دیا، دونوں ممالک بڑے تصادم سے بچنے کیلیے تیار ہیں اور امریکا کے ساتھ تجارت جاری رکھنا چاہتے ہیں۔ تھائی فوج کا کہنا تھا کہ کمبوڈین دستوں نے اوبون رتچاتھانی صوبے کے نام یوئن ضلع کے چونگ بوک علاقے میں متعدد مقامات پر پہلے فائرنگ کی جس میں ایک تھائی فوجی ہلاک اور چار زخمی ہوگئے تھے۔ جبکہ کمبوڈیا کی وزارت دفاع کے مطابق تھائی فوج نے علی الصبح دو مختلف مقامات پر حملے کیے جبکہ کمبوڈین فوج نے کئی روز سے جاری اشتعال انگیزی کے باوجود جواب نہیں دیا۔ جولائی میں یہ سرحدی تنازع پانچ روزہ جنگ میں تبدیل ہوگیا تھا جس میں کم از کم 48 افراد ہلاک اور تین لاکھ افراد کو عارضی طور پر نقل مکانی پر مجبور ہونا پڑا تھا۔ اس دوران دونوں ملکوں نے راکٹ اور بھاری توپ خانوں کا کھلے عام استعمال کیا تھا۔

Source: social media