خیبر پختونخوا میں پاکستانی فوج کے دو آپریشنز میں 35 شدت پسند ہلاک

پاکستانی فوج کا کہنا ہے کہ صوبہ خیبر پختونخوا کے دو مقامات پر سکیورٹی فورسز کے آپریشنز کے دوران 35 شدت پسندوں کو ہلاک کیا گیا ہے۔ فوج کے شعبہ تعلقات عامہ (آئی ایس پی آر) کا کہنا ہے کہ ضلع باجوڑ میں شدت پسندوں کی موجودگی کی اطلاع پر سکیورٹی فورسز نے انٹیلیجنس بیسڈ آپریشن کیا جس میں ’فائرنگ کے شدید تبادلے‘ کے دوران 22 شدت پسندوں کو ہلاک کیا گیا۔ آئی ایس پی آر کے مطابق دوسرا آپریشن ضلع جنوبی وزیرستان میں کیا گیا جہاں سکیورٹی فورسز نے 13 مزید شدت پسندوں کو ہلاک کیا۔ فوج کا کہنا ہے کہ شدت پسندوں کی فائرنگ سے 12 فوجی اہلکار مارے گئے ہیں۔ اس نے مزید بتایا کہ شدت پسندوں سے اسلحہ برآمد کیا گیا اور وہ ان علاقوں میں متعدد دہشتگرد حملوں میں ملوث رہے تھے۔ پاکستانی فوج نے شدت پسندوں کے ’انڈین سپارنسرڈ‘ ہونے کا دعویٰ کیا ہے۔ خیال رہے کہ انڈین حکام ماضی میں ایسے الزامات کی تردید کر چکے ہیں۔ آئی ایس پی آر نے یہ بھی کہا کہ ’انٹیلیجنس رپورٹس سے تصدیق ہوتی ہے کہ اِن کارروائیوں میں افغان شہری ملوث ہیں۔‘ اس نے دعویٰ کیا کہ شدت پسندوں کی جانب سے پاکستان میں حملوں کے لیے افغان سرزمین استعمال کی جا رہی ہے۔ ’پاکستان افغان عبوری حکومت سے توقع کرتا ہے کہ وہ اپنی ذمہ داریاں نبھائے اور پاکستان کے خلاف دہشتگرد سرگرمیوں میں اپنی سرزمین استعمال ہونے کو روکے۔‘ خیال رہے کہ افغانستان میں طالبان حکومت کے وزیرِ دفاع ملّا یعقوب نے دعویٰ کیا تھا کہ پاکستان کے ’سکیورٹی ادارے کمزور ہیں اور اس کمزوری کو چھپانے کے لیے وہ افغانستان پر الزامات عائد کرتے ہیں۔‘ بی بی سی کو دیے ایک انٹرویو میں ملّا یعقوب نے مزید کہا تھا کہ ’تحریک طالبان پاکستان اور بلوچ (علیحدگی پسند) اپنی کارروائیاں پاکستان میں کرتے ہیں۔ وہ ڈیورنڈ لائن سے سینکڑوں کلومیٹر دور (پاکستان کے) بڑے شہروں میں حملے کرتے ہیں۔‘

Source: social media