خوفناک تصادم، اسپین میں ہائی اسپیڈ ٹرین پٹری سے اچانک اتر کر آنے والی ٹرین سے ٹکرا گئی

اداموز (19 جنوری 2026): اسپین میں ہائی اسپیڈ ٹرین پٹری سے اچانک اتر کر آنے والی ٹرین سے ٹکرا گئی، اس خوفناک تصادم میں 39 افراد ہلاک ہو گئے ہیں اور 100 سے زائد زخمی ہوئے۔ ایسوسی ایٹڈ پریس کے مطابق اسپین کے جنوبی علاقے میں ایک تیز رفتار ٹرین پٹری سے اترنے کے بعد مخالف سمت سے آنے والی ٹرین سے ٹکرا گئی، جس سے دوسری ٹرین بھی پٹری سے اتر گئی، حادثے میں دونوں ٹرینوں کو شدید نقصان پہنچا۔ خوفناک ٹرین حادثے میں ٹرین کا ڈرائیور بھی ہلاک ہو گیا ہے، بدقسمت ٹرین میڈرڈ سے ہیولوا جا رہی تھی۔ حادثے کے وقت ایک ٹرین میں 300 سے زائد جب کہ دوسری میں تقریباً 100 مسافر سوار تھے۔ یہ تصادم اتوار کی سہ پہر اس وقت ہوا جب ایک تیز رفتار ٹرین پٹری سے اتری، مخالف سمت سے پٹری پر کود گئی اور اداموز کے قریب آنے والی ٹرین سے ٹکرا گئی، ہسپانوی پولیس نے پیر کو کہا کہ تیز رفتار ٹرین کے تصادم میں کم از کم 39 افراد ہلاک ہو گئے ہیں۔ پیر کی صبح بھی امدادی کارروائیاں جاری تھیں، ہسپانوی ریڈ کراس نے حادثے کی جگہ کے قریب اداموز قصبے میں ایک امدادی مرکز قائم کیا، جو ہنگامی خدمات اور معلومات حاصل کرنے والے لوگوں کو مدد فراہم کرتا رہا۔ اسپین کے سول گارڈ اور سول ڈیفنس کے ارکان نے رات بھر سائٹ پر کام کیا۔ ہسپانوی ریلوے انفراسٹرکچر آپریٹر نے میڈرڈ اور اندلس کے درمیان تمام ٹرین سروسز کو اگلے نوٹس تک معطل کر دیا ہے۔

Source: social media