قاہرہ کی فضاؤں میں پہلی بار ہزاروں ڈرونز کے ذریعے رمضان کا استقبال

مصر میں اس سال پہلی بار ایک اچھوتے اور منفرد انداز میں ماہِ رمضان کا استقبال کیا گیا ہے جہاں ہزاروں ڈرونز نے فضا میں اسماء الحسنیٰ اور اس مقدس مہینے سے منسوب کلمات اور روایتی علامتیں تخلیق کرکے سب کو حیران کر دیا۔ منگل کی شام رویتِ ہلال کی تقریب کے فوری بعد قاہرہ کے باسی اس وقت حیرت زدہ رہ گئے جب ہزاروں کی تعداد میں ڈرون طیارے آسمان پر نمودار ہوئے۔ خاص طور پر الحسین، الازہر اور الجمالیہ کے علاقوں اور ان کے گردونواح میں ان ڈرونز نے حسن و جمال کا ایسا شاہکار پیش کیا کہ دیکھنے والوں کی سانسیں تھم گئیں۔ ان ڈرونز نے فضا میں ایک قطار میں منظم ہو کر مختلف الفاظ تشکیل دیے جو رمضان المبارک کی عکاسی کر رہے تھے، جن میں ’رمضان کریم‘، ’اللہ‘ اور ’الودود‘ کے ساتھ ساتھ مصر کا مشہور لوک گیت ’وحوی یا وحوی‘ نمایاں تھے۔ اس کے علاوہ ڈرونز کی مدد سے رمضان کی پہچان سمجھے جانے والے توپ کے گولے اور سحری کے وقت جگانے والے ’مسحراتی‘ کی تصاویر بھی بنائی گئیں۔ اس خوبصورت منظر کو دیکھنے کے لیے شہریوں کی بڑی تعداد جمع ہوگئی جنہوں نے اپنے موبائل فونز سے ویڈیوز بنائیں اور اس نئے انداز سے خوشی کا اظہار کیا۔ سوشل میڈیا پر بھی مصری صارفین نے ان تصاویر اور ویڈیوز کو بڑے پیمانے پر شیئر کیا اور اس تخلیقی کاوش کو سراہا۔ واضح رہے کہ مصر میں حالیہ عرصہ کے دوران مختلف تقریبات میں ڈرونز کا استعمال بڑھ گیا ہے۔ گذشتہ دنوں گرینڈ مصری میوزیم کی افتتاحی تقریب میں بھی سینکڑوں ڈرونز کی مدد سے قدیم مصری بادشاہ توت عنخ آمون کا تھری ڈی خاکہ فضا میں بنایا گیا تھا۔ اس شو میں خوفو کی مشہور کشتی، جنگی رتھ اور بادشاہ کی شاہی کرسی سمیت دیگر شاندار نمونے بھی پیش کیے گئے تھے۔ تاہم رمضان المبارک کی خوشی میں اس ٹیکنالوجی کا استعمال پہلی مرتبہ کیا گیا ہے۔

Source: social media