اٹلی کی حکومت نے اسکولوں میں برقع اور نقاب پر پابندی عائد کرنے اور کلاس رومز میں غیر ملکی طلبہ کی تعداد 30 فیصد تک محدود کرنے کا قانون منظور کر لیا، خلاف ورزی پر 1 ہزار یورو تک جرمانہ عائد کیا جا سکے گا۔

اطالوی وزیرِ اعظم جارجیا میلونی کی کابینہ نے جمعرات کو اس حوالے سے فرمان جاری کیا تھا، جس کا اطلاق فوری طور پر ہوگیا ہے۔

اس پابندی کو 60 روز کے اندر پارلیمنٹ سے منظور کرانا ضروری ہو گا، اس کے لیے صدر سرجیو ماتاریلا کی توثیق بھی درکار ہے۔

نئے ضابطے کے تحت 28-2027ء کے تعلیمی سال سے ان کلاسوں میں غیر ملکی طلبہ کی تعداد 30 فیصد تک محدود ہو گی جہاں طلبہ اطالوی زبان سے مناسب واقفیت نہیں رکھتے۔

حکام ضرورت سے زیادہ طلبہ کو دیگر قریبی اسکولوں میں منتقل کر سکیں گے، جبکہ بعض اسکولوں کو استثنیٰ اور اضافی لسانی معاونت فراہم کی جائے گی۔

حکومت کا کہنا ہے کہ اقدامات کا مقصد اسکولوں میں انضمام اور اطالوی زبان سیکھنے کے عمل کو بہتر بنانا ہے، تاہم اپوزیشن جماعتوں، اساتذہ کی یونینوں اور اسکول پرنسپلز نے قانون پر تحفظات کا اظہار کرتے ہوئے اس کے عملی نفاذ اور وسائل کی دستیابی پر سوالات اٹھائے ہیں۔