حیدرآباد:

نیشنل اکیڈمی آف لیگل اسٹڈیز اینڈ ریسرچ (NALSAR) یونیورسٹی، حیدرآباد کے فارغ التحصیل طلبہ کے ایک بڑے گروہ نے بھارت کے چیف جسٹس سوریا کانت کو یونیورسٹی کی 2026 کی تقریبِ تقسیمِ اسناد (کونووکیشن) میں بطورِ مہمانِ خصوصی مدعو کرنے پر شدید اعتراض جتایا ہے۔

سندِ فراغت حاصل کرنے والے 2026 بیچ کے طلبہ نے یونیورسٹی کے وائس چانسلر، رجسٹرار، فیکلٹی ممبران اور دیگر اعلیٰ حکام کو ایک باضابطہ خط تحریر کیا ہے، جس میں چیف جسٹس کو مدعو کرنے کے فیصلے پر فوری نظرثانی کی اپیل کی گئی ہے۔

طلبہ نے اپنے خط میں چیف جسٹس کے حالیہ متنازع ریمارکس اور عدالتی پیش رفت پر گہری تشویش کا اظہار کیا۔ خط میں خاص طور پر چیف جسٹس کے جنتر منتر احتجاج سے متعلق تبصروں اور بھارتی نوجوانوں کے بارے میں مبینہ طور پر ناگوار الفاظ کے استعمال کو نشانہ بنایا گیا۔

طلبہ نے خط میں لکھا:

"ہم فارغ التحصیل بیچ کے طلبہ محترم چیف جسٹس سوریا کانت کو ہمارے کونووکیشن کا مہمانِ خصوصی بنائے جانے کے فیصلے پر اپنے شدید تحفظات کا اظہار کرتے ہیں۔

نوجوانوں کو 'کاکرچ' (سوسک) قرار دینے سے لے کر پولیس تشدد کی ویڈیوز دیکھنے کے لیے 'وقت نہ ہونے' جیسے بے حس بیانات تک، چیف جسٹس نے ہمارے جیسے طلبہ کے تئیں شدید عدم توجہی اور بے حسی کا مظاہرہ کیا ہے۔ ایسے شخص کے ہاتھوں وہ ڈگریاں حاصل کرنا جو ہمارے لیے تعلیمی اور جذباتی طور پر بے حد اہمیت رکھتی ہیں، ہمارے ضمیر کے بالکل خلاف ہے۔"

طلبہ کا کہنا ہے کہ ان حالات میں چیف جسٹس کو مدعو کرنا آئینی جوابدہی اور تعلیمی آزادی کی بنیادی قدروں کے منافی ہے، لہٰذا یونیورسٹی انتظامیہ کو یہ فیصلہ فوری طور پر واپس لینا چاہیے۔

واضح رہے کہ اس واقعے سے محض دو ہفتے قبل ٹاٹا انسٹی ٹیوٹ آف سوشل سائنسز (TISS)، ممبئی نے بھی اپنی 86 ویں تقریبِ تقسیمِ اسناد کو مقررہ تاریخ (2 اگست) سے صرف دو دن پہلے غیر معینہ مدت کے لیے ملتوی کر دیا تھا۔

حکام کی جانب سے سیکیورٹی خدشات اور چیف جسٹس سوریا کانت کی آمد پر ممکنہ طلبہ احتجاج کے پیشِ نظر یہ منسوخی کی گئی تھی، جہاں چیف جسٹس کو بطورِ مہمانِ خصوصی شرکت کرنا تھی۔

Source: Admin