حیدرآباد، 11 اکتوبر :) دہلی سے چنئی جا رہی انڈیگو کی ایک پرواز کو اتوار کے روز اس وقت راجیو گاندھی بین الاقوامی ہوائی اڈے (شمش آباد) کی طرف موڑنا پڑا، جب دوران پرواز ایک مسافر کے پاور بینک میں اچانک آگ لگ گئی۔ اس واقعے سے مسافروں میں افراتفری مچ گئی۔
موصولہ اطلاعات کے مطابق، انڈیگو کی پرواز 6ای6115 اپنے مقررہ وقت سے تقریباً 20 منٹ کی تاخیر سے دوپہر تقریباً 1:30 بجے دہلی سے روانہ ہوئی تھی۔ سفر کے دوران، اوپر سامان رکھنے کی جگہ میں رکھے ایک پاور بینک سے دھواں اور شعلے اٹھتے ہوئے دیکھے گئے ۔
طیارے میں تعینات عملے کے چوکس ارکان نے فوری کارروائی کرتے ہوئے طیارے میں موجود حفاظتی آلات کا استعمال کیا اور آگ پر فوراً قابو پا لیا، جس سے ایک بڑا حادثہ ٹل گیا۔ اس کے بعد احتیاطی تدبیر کے طور پر طیارے کو حیدرآباد ہوائی اڈے پر ہنگامی طور پر اتارا گیا۔
اطلاعات کے مطابق، ہوائی اڈے کے حکام نے مسافروں کو چنئی پہنچانے کے لیے دوسری متبادل پرواز کا انتظام کیا ہے ۔